Санкт-Петербургда беларуслик психолог Андрей Русских ҳибсга олинди, у Беларусь президенти Александр Лукашенкони ҳақорат қилишда айбланмоқда, деди Русскихнинг адвокати Мария Беляева «РБК»га.
«Бу ишда иккита модда бор — президентни ҳақорат қилиш ҳамда ижтимоий ва бошқа турдаги нафратни қўзғатиш тўғрисидаги моддалар. Бу ижтимоий тармоқлардаги изоҳлар билан боғлиқ. Биз албатта шикоят қиламиз. У 6 июлга қадар Колпино шаҳридаги «Крести» тергов изоляторида бўлади, аммо кейин унга нисбатан эҳтиёт чораси узайтирилиши мумкин », — деди у.
Адвокатнинг аниқлик киритишича, психолог 28 май куни Санкт-Петербургдаги темир йўл вокзалида қўлга олингунга қадар қидирувда эканини билмаган.
Психолог Беларусь Жиноят кодексининг 368-моддаси, 1-қисми (Беларусь президентини оммавий ҳақорат қилиш) ва 130-моддаси (ирқий, миллий ёки бошқа турдаги нафратни қўзғатиш) бўйича айбланмоқда. Биринчи модда максимал тўрт йилгача, иккинчиси эса беш йилгача озодликдан маҳрум қилиш жазосини назарда тутади.
Май ойи бошида Беларусь суди россиялик Софя Сапегани олти йиллик колонияга ҳукм қилган эди. У ижтимоий нафратни қўзғатиш ва шахсий маълумотларни ноқонуний йиғишда айбдор деб топилган.
Софя Сапега — Nexta нашрининг собиқ бош муҳаррири Роман Протасевичнинг севгилиси. 2021 йилнинг май ойида улар ўтирган Афина—Вильнюс йўналишидаги Ryanair самолёти мажбуран Минскка қўндирилган эди, ўшанда жуфтлик ҳибсга олинган.
Роман Протасевич ҳибсга олинганидан сўнг жиноий иши бўйича тергов билан ҳамкорлик қила бошлади, шунингдек, у Беларусь ва Россиядаги ҳукуматпараст оммавий ахборот воситаларига бир нечта интервьюлар берди. Ҳозир у уй қамоғида, интернетдан фойдаланишга рухсат берилган. Протасевичга қарши суд ҳали бошланмаган.
Мавзуга доир:
Изоҳ (0)