Россиянинг Иккинчи Ғарбий округ ҳарбий суди тожикистонлик Т.М.Назаровни 21 та жиноят содир этганликда айблаб, умрбод қамоқ жазосига ҳукм қилди. Бу ҳақда Россия Федерал хавфсизлик хизматининг (ФХХ) Москва ва Москва вилояти бўйича матбуот хизмати баёнотига таяниб, “ТАСС” хабар берди.
Назаров террорчилик фаолиятини ташкил этиш ва унда иштирок этиш, қурол, ўқ-дорилар ва портловчи моддаларни қонунга хилоф равишда олиш, сақлаш ёки олиб юриш, ноқонуний равишда портловчи қурилмаларни тайёрлаш бўйича айбдор деб топилган.
Назаровга умрбод қамоқ жазосидан ташқари 1,5 миллион рубль миқдорида жарима ҳам белгиланди.
Шу билан бирга, ФХХ Тожикистон фуқароси қачон ҳибсга олингани ва унга қачон ҳукм чиқарилгани ҳақида маълумот бермаган.
“Россия Федерал хавфсизлик хизмати ходимлари ИШИД халқаро террорчилик ташкилоти етакчиларидан бири, Тожикистон республикаси фуқароси, 1989 йилда туғилган Назаров Т.М.нинг ноқонуний фаолиятига чек қўйди. Аниқланишича, Назаров ИШИД тарафдори бўлиб, қўлбола портловчи мосламалар ёрдамида Москва вилояти ва Новосибирскда қўпорувчилик ва терактлар содир этиш мақсадида террорчилик ячейкасини ташкил этган, унда эса одамлар гавжум жойларда, шунингдек, Россия темирйўллари объектларида портлаш содир этиш режалаштирилган”, — дейилади баёнотда.
ФХХ матбуот хизматининг қайд этишича, Назаров ўзи Сурияда бўлган вақтида Тожикистон фуқароларини ИШИД сафига жалб қилган.
“Хорижий шериклар билан ўзаро ҳамкорлик натижасида Россия ФХХ ходимлари Назаровни Сурия араб республикаси ҳудудида аниқлаб, қўлга олди, шундан сўнг у Россияга олиб кетилди. Олиб борилган тезкор тадбирлар давомида ячейка таркибига кирган террористлар ушланиб, жиноий жавобгарликка тортилди. Шундай қилиб, кўрсатилган террорчилик ячейкаси фаолияти тугатилади. Ўтказилган тергов ҳаракатлари Т.М.Назаровнинг айбига оид тўлиқ далилларни тўплади”, — дея қўшимча қилди ФХХ матбуот хизмати.
ИШID экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)