Беларуснинг Светлогорск шаҳрида яшовчи уч фуқаро Россия ҳарбий техникасининг Украина билан чегарага етиб боришини секинлаштириш мақсадида темир йўлда қўпорувчилик қилгани учун узоқ муддатга қамоқ жазосига ҳукм қилинди. Бу ҳақда «Гомел баҳори» инсон ҳуқуқлари лойиҳасига таяниб, Meduza хабар берди.
Тергов маълумотларига кўра, Олег Молчанов, Дмитрий Равич ва Денис Дикун 28 февраль, урушнинг бешинчи кунида темир йўлнинг Украинага олиб борадиган Жерд—Останковичи қисмида жойлашган бошқарув тизими қутисига ўт қўйган. Натижада йўлнинг ушбу қисмида светофор ва стрелкалар вақтинчалик ишдан чиққан.
Айбланувчилар терроризм, давлатга хиёнат, алоқа воситаларига қасддан зарар етказиш ва экстремистик тузилмада иштирок этиш каби моддалар бўйича айбдор деб топилди. Суд Молчановни 21 йилга, Равични 22 йилга, Дикунни 23 йилга озодликдан маҳрум қилди. Бундан ташқари, уларнинг ҳар бирига 4800 Беларусь рубли (1800 доллар) миқдорида жарима солинди ва тинтувлар давомида топилган мол-мулки мусодара қилинди.
«Зеркало» нашри хабарига кўра, бу Беларусдаги темир йўлда қўпорувчилик қилиш ҳолатлари бўйича энг оғир жазо ҳисобланади. Шу пайтгача бундай иш бўйича максимал муддат 16 йиллик қамоқ жазоси эди.
Россиянинг Украинага босқини бошланганидан кейинги дастлабки ҳафталарда Беларусда рус ҳарбий техникасининг олиб ўтилишини секинлаштириш учун ўнлаб темир йўл саботажлари уюштирилган. Май ойида Александр Лукашенко террорчилик ҳужумига уриниш учун жазони ўлим жазосигача қаттиқлаштирди.
Суддан олдин ҳам Молчанов, Равич ва Дикун Беларусь расмийлари томонидан тузилган «террорчилар» рўйхатига киритилган. Ҳуқуқ ҳимоячилари уларни сиёсий маҳбуслар деб тан олган.
Изоҳ (0)