Самарқанд вилояти Каттақўрғон туманида диний ақидапарастлик ғоялари билан йўғрилган маърузаларни тарқатган блогер йигитга ҳукм ўқилди, деб хабар беради ИИВ ахборот хизмати.
Қайд этилишича, блогер йигит Instagram’да ўзи профил очиб, 2022 йилнинг 13 май куни диний ақидапарастлик ғоялари билан йўғрилган маърузаларни тарқатган. Тақиқланган видеороликда Абу-Салоҳнинг жанг майдонида экани, у ерда мусулмонлар қатл қилинаётгани, қамоқхоналарда муслималар хўрланаётгани ва шу каби зулм бўлаётган даврда турли кераксиз маслаҳатлар ҳақида тортишиб юриш лозим эмаслиги, жиҳодга шошилиш кераклиги ҳақида сўз боради.
Бундан ташқари, айбланувчи 2022 йилнинг сентябрь ойида Россияда ҳам бир қанча танишларига диний мазмундаги маърузаларни Telegram орқали юборгани маълум бўлган.
Мазкур ҳолат юзасидан жиноят иши жиноят ишлари бўйича Каттақўрғон туман судида кўриб чиқилган. Йигитнинг ёшлиги инобатга олиниб, унга инсонпарварлик тамойили асосида ҳукм ўқилган.
Суд жараёнида 20 ёшли йигит ўзининг Instagram, Telegram профилларига қўйган нашидаларини асл маъносини тушунмаганини изоҳлаб, фақатгина обуначи йиғиш мақсадида омманинг эътиборини тортмоқчи бўлганини билдирган.
“Агар бу даражада бўлиб кетишини билганимда қўймас эдим. Кўпроқ ота-онамни, қариндошларимни ўйлайман”, — дейди айбланувчи.
Суд ҳукмига кўра, судланувчи Жиноят кодексининг 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми “г” бандида назарда тутилган жиноятни содир этганликда айбли деб топилиб, Жиноят кодексининг 57-моддасини қўллаб, унга 3 йилга озодликдан маҳрум қилиш жазоси тайинланди.
Диний мазмундаги материалларни тарқатиш
Бундан олдин Ўзбекистон мусулмонлари идораси ижтимоий тармоқларда “жума табриги”, “Қуръони карим оятлари”, “Пайғамбар алайҳиссалом ҳадислари”, юртимиз уламолари ва имом-домлаларининг маъвизаларини тарқатиш гўёки мумкин эмас экани айтилаётган асоссиз хабарларга муносабат билдирганди.
Диний идора бузғунчи оқимлар ғояларини ўзига жалб этувчи мусиқий оҳанг, фотосурат ёки рамзлар орқали зимдан тарқатишга уринаётганини эслатиб ўтган. Шунинг учун ҳам экстремистик ғояларни ҳар қандай шаклда хоҳ жума табриги бўлсин, хоҳ бошқача атрибут ёки сурат шаклида бўлсин, уларни тарқатиш, сақлаш ва фойдаланиш қонунан таъқиқланади. Аввалроқ тарқатиш тақиқланган экстремистик сайт ва тармоқлар рўйхати эълон қилинган эди. Июнь бошларида интернет орқали ақидапарастлик ғоялари билан йўғрилган материаллар тарқатган қашқадарёлик йигит 6 йилга озодликдан маҳрум этилганди.
Изоҳ (0)