Тожикистонда 11 апрелдан бошлаб электр энергияси тақдимоти бўйича чекловлар олиб ташланади. Бу ҳақда AsiaPlus хабар берди.
Вахш дарёсида ёғингарчилик ва ҳароратнинг кўтарилиши сабабли сув миқдори ортган. Бу эса энергия чекловларини тезда олиб ташлаш имконини яратди.
“Энди мамлакат аҳолисига электр энергияси 24 соат давомида тақдим этилади”, деди “Барки Тожик” компанияси вакили Қурбон Аҳмадзода.
Ҳар йили куз, қиш ва баҳор ойларида Тожикистон электр энергияси етишмовчилиги билан юзлашади. Совуқ мавсумда мамлакатнинг аксарият ҳудудларида электр таъминоти чекланган режимда ишлайди. Бу одатда апрель ойигача давом этади.
Тожикистонда электрдан ноқонуний фойдаланганлар жиноий жавобгарликка тортилади
2 апрель куни мамлакат Жиноят кодексига тегишли ўзгартиришлар қабул қилинди. У жарима ёки 3 йилгача қамоқни, агар қилмиш катта миқдорда содир этилган бўлса, 6 йилгача озодликдан маҳрум қилиш жазосини назарда тутади.
Шунингдек, қилмиш уюшган гуруҳ ёхуд жиноий уюшма томонидан содир этилган бўлса, 6 йилдан 10 йилгача қамоқ жазоси белгиланади.
Президент Эмомали Раҳмон 27 март куни бўлиб ўтган ҳукумат йиғилишида “электр энергиясидан оқилона фойдаланилмаётгани” ҳақида ташвишини билдирганди. У электр энергиясидан ноқонуний фойдаланиш ва унинг учун тўловларни амалга оширмаслик учун жиноий жавобгарлик белгилаш бўйича кўрсатма берганди. Янги ўзгартиришлари президент кўрсатмасига асосан қабул қилинмоқда.
“Барки Тожик” давлат энергетика холдинги маълумотларига кўра, 2025 йил бошига келиб аҳолининг қарзи 1,7 миллиард сомонийни (155 миллион доллардан ортиқ) ташкил этган. Мутахассислар муаммо фуқароларнинг қарзларида эмас, балки энергетика соҳасининг самарасиз бошқарувида эканини айтган.
Изоҳ (0)