Tojikistonda elektr energiyasidan noqonuniy foydalanganlik uchun javobgarlikni kuchaytirish maqsadida Jinoyat kodeksiga o‘zgartirishlar kiritildi. Bu haqda AsiaPlus xabar berdi.
Parlament quyi palatasi 2-aprel kuni Jinoyat kodeksiga o‘zgartirishlarni qabul qildi. U prezident Emomali Rahmonning topshirig‘i asosida Adliya vazirligi tomonidan tayyorlangan.
O‘zgartirishlar jarima yoki 3 yilgacha qamoqni, agar qilmish katta miqdorda sodir etilgan bo‘lsa, 6 yilgacha ozodlikdan mahrum qilish jazosini nazarda tutadi. Shuningdek, qilmish uyushgan guruh yoxud jinoiy uyushma tomonidan sodir etilgan bo‘lsa, 6 yildan 10 yilgacha qamoq jazosi belgilanadi.
Tuzatishlar Jinoyat kodeksining “Aldov yoki ishonchni suiiste’mol qilish yo‘li bilan mulkiy zarar yetkazish” moddasiga kiritilgan. Adliya vaziri Muzaffar Ashuriyon loyihani deputatlarga taqdim etar ekan, iste’molchilarning elektr energiyasi uchun to‘lovdan qochish maqsadida hisoblagich ko‘rsatkichlarini o‘zgartirishi yoki hisoblagichlarni chetlab o‘tib ulanish holatlari mavjudligini aytdi.
Oqibatda respublikaning iqtisodiy manfaatlariga jiddiy zarar yetkazilmoqda, dedi vazir.
Emomali Rahmon 27-mart kuni bo‘lib o‘tgan hukumat yig‘ilishida “elektr energiyasidan oqilona foydalanilmayotgani” haqida tashvishini bildirdi. Rahmon elektr energiyasidan noqonuniy foydalanish va uning uchun to‘lovlarni amalga oshirmaslik uchun jinoiy javobgarlik belgilash bo‘yicha ko‘rsatma berdi.
Tojikiston hukumati muntazam ravishda aholini elektr energiyasi bo‘yicha qarzlarning ortishi va noqonuniy ulanishlarda ayblaydi. “Barki Tojik” davlat energetika xoldingi ma’lumotlariga ko‘ra, 2025-yil boshiga kelib aholining qarzi 1,7 milliard somoniyni (155 million dollardan ortiq) tashkil etgan.
Ilgari “Ozodlik radiosi” jurnalistlari bilan suhbatda tojikistonliklar billing hisoblagichlari o‘rnatilgandan so‘ng ular to‘lovlarni o‘z vaqtida amalga oshirayotganini, aks holda elektr energiyasi uzib qo‘yilishini ta’kidlagan edi. Mutaxassislar ham bu raqamlarning haqiqiyligiga shubha bildirib, muammo fuqarolarning qarzlarida emas, balki energetika sohasining samarasiz boshqaruvida ekanini aytdi.
Bundan tashqari, ismini oshkor qilishni istamaydigan energetika nazoratchilarining o‘zlari “Ozodlik”ka aytishicha, to‘lanmagan asosiy qarzlar oddiy fuqarolarga emas, balki yuqori lavozimli amaldorlar bilan bog‘liq yirik kompaniyalarga to‘g‘ri keladi.
Izoh (0)