Ўзбекистонда 2025 йил якунига қадар Аи-80 бензинидан фойдаланиш ва сотишни чеклаш учун барча куч ва ресурслар сафарбар этилади. Бу ҳақда “Ўзбекистон – 2030” стратегиясини “Атроф-муҳитни асраш ва яшил иқтисодиёт” йилида амалга оширишга оид давлат дастури тўғрисидаги президент фармонида белгиланди.
Бунда аҳолини сифатли, экологик тоза ва арзон ёнилғи билан таъминлаш чоралари кўрилади.
Атроф-муҳит ва табиатни муҳофаза қилиш технологиялари илмий-тадқиқот институти лаборатория мудири Зикрилла Алимовнинг айтишича, ўрганишларга кўра, Аи-80 бензини ҳозирда Россия билан Ўзбекистонда ишлаб чиқарилмоқда. Бугунги кунда евро-3 (Аи-80) ёнилғиси фақат Ўзбекистон ва Афғонистонда фойдаланилмоқда.
“Албатта, ундан воз кечиш, ишлаб чиқаришни тўхтатиш ёнилғи етишмовчилигига олиб келгани сабабли фармонда юқори октанли ёнилғиларни арзонлаштириш, ёки ўрнига бошқа экологик тоза ёнилғиларни барча куч ва имкониятларни сафарбар қилган ҳолда ишлаб чиқариш орқали Аи-80 бензинидан воз кечиш мақсад қилинган”, дейди мутахассис.
Ҳужжат билан, шунингдек, Республиканинг барча ҳудудларида жойлашган иссиқлик ва электр энергияси ишлаб чиқариш корхоналарига ёнилғи сифатида мазутдан фойдаланишни тўлиқ тақиқланади. Авариявий ёнилғи сифатида Экология, атроф-муҳитни муҳофаза қилиш ва иқлим ўзгариши вазирлигини хабардор қилиб, Вазирлар Маҳкамаси билан келишган ҳолда фойдаланиш ҳолатлари бундан мустасно.
Ўзбекистонда Аи-80 бензинини тақиқлаш
Ўзбекистонда Аи-80 бензинидан босқичма-босқич воз кечиш режалаштирилаётгани ҳақида 2024 йил бошларида Энергетика вазирлиги хабар берганди. Вазирлик ушбу бензин кўп мамлакатларда тақиқланганини, ҳатто нефть маҳсулотларини тўлиқ импорт қиладиган Қирғизистон ва Тожикистонда ҳам аллақачон истеъмолдан олинганини билдирганди.
2024 йил 29 январь куни ўтказилган йиғилишда Шавкат Мирзиёев бош вазир Абдулла Ариповга 2025 йилдан Аи-80 маркали бензиндан воз кечиш масаласини узил-кесил ҳал қилиш бўйича топшириқ берганди. 2025 йилга бориб Фарғона нефтни қайта ишлаш заводида Аи-80 ишлаб чиқарилиши тўхтатилса, 2026 йилга бориб Бухоро нефтни қайта ишлаш заводи тўлиғича сифатлироқ ёнилғи ишлаб чиқаришга ўтказилиши маълум қилинган эди.
Изоҳ (0)