Tojikistonda 11-apreldan boshlab elektr energiyasi taqdimoti bo‘yicha cheklovlar olib tashlanadi. Bu haqda AsiaPlus xabar berdi.
Vaxsh daryosida yog‘ingarchilik va haroratning ko‘tarilishi sababli suv miqdori ortgan. Bu esa energiya cheklovlarini tezda olib tashlash imkonini yaratdi.
“Endi mamlakat aholisiga elektr energiyasi 24 soat davomida taqdim etiladi”, dedi “Barki Tojik” kompaniyasi vakili Qurbon Ahmadzoda.
Har yili kuz, qish va bahor oylarida Tojikiston elektr energiyasi yetishmovchiligi bilan yuzlashadi. Sovuq mavsumda mamlakatning aksariyat hududlarida elektr ta’minoti cheklangan rejimda ishlaydi. Bu odatda aprel oyigacha davom etadi.
Tojikistonda elektrdan noqonuniy foydalanganlar jinoiy javobgarlikka tortiladi
2-aprel kuni mamlakat Jinoyat kodeksiga tegishli o‘zgartirishlar qabul qilindi. U jarima yoki 3 yilgacha qamoqni, agar qilmish katta miqdorda sodir etilgan bo‘lsa, 6 yilgacha ozodlikdan mahrum qilish jazosini nazarda tutadi.
Shuningdek, qilmish uyushgan guruh yoxud jinoiy uyushma tomonidan sodir etilgan bo‘lsa, 6 yildan 10 yilgacha qamoq jazosi belgilanadi.
Prezident Emomali Rahmon 27-mart kuni bo‘lib o‘tgan hukumat yig‘ilishida “elektr energiyasidan oqilona foydalanilmayotgani” haqida tashvishini bildirgandi. U elektr energiyasidan noqonuniy foydalanish va uning uchun to‘lovlarni amalga oshirmaslik uchun jinoiy javobgarlik belgilash bo‘yicha ko‘rsatma bergandi. Yangi o‘zgartirishlari prezident ko‘rsatmasiga asosan qabul qilinmoqda.
“Barki Tojik” davlat energetika xoldingi ma’lumotlariga ko‘ra, 2025-yil boshiga kelib aholining qarzi 1,7 milliard somoniyni (155 million dollardan ortiq) tashkil etgan. Mutaxassislar muammo fuqarolarning qarzlarida emas, balki energetika sohasining samarasiz boshqaruvida ekanini aytgan.
Izoh (0)