Тожикистонда Роғун гидро электр станциясини (ГЭС) қуриш лойиҳасини молиялаштиришга тайёргарлик кўришда Жаҳон банкининг экологик ва ижтимоий стандартларига риоя этилмагани аниқланди. “Чегара билмас дарёлар” халқаро экологик коалицияси “Роғун ГЭС лойиҳаси: Жаҳон банки талабларига мувофиқлик бўйича ҳисобот” номли ҳужжатни эълон қилди.
Экологлар банкнинг олтита муҳим стандартлари бузилганини аниқлади: экологик баҳолашнинг умумий қоидалари, биологик хилма-хилликни сақлаш, ресурслардан самарали фойдаланиш, тўғонлар хавфсизлиги, жамоатчилик иштироки ва мажбурий кўчириш. Шунингдек, инвестицион лойиҳаларни молиялаштиришда банкнинг экологик ва ижтимоий сиёсатига риоя қилинмаган.
Вазиятни оғирлаштираётган омил шуки, Жаҳон банки Роғун ГЭС лойиҳаси учун барча молиялаштирувчи ташкилотлар (Осиё инфратузилмавий инвестициялар банки, Осиё тараққиёт банки, Европа инвестиция банки ва бошқалар) номидан экологик ва ижтимоий кафолатларни ишлаб чиқиш масъулиятини ўз зиммасига олган.
Бундай ёндашувга рози бўлган бошқа молиявий ташкилотлар шу орқали Жаҳон банки стандартларини ўзларининг стандартларига тенг деб тан олган. Агар бу стандартлар бузилса, лойиҳада иштирок этаётган ўнлаб бошқа молиявий ташкилотларнинг стандартлари ҳам бузилган ҳисобланади.
Ишончимиз комилки, Роғун ГЭС лойиҳасининг тақдим этилган варианти Жаҳон банкининг ижтимоий-экологик тамойилларига мос келмайди ва халқаро тараққиёт банклари томонидан жорий кўринишда молиялаштирилмаслиги керак. Банк стандартлари ва процедураларига риоя қилинмагани туфайли лойиҳа кўплаб самарасиз ва хавфли элементларни ўз ичига олади, бу эса уни амалга ошириш жараёнида жиддий экологик ва ижтимоий зарар етказиши мумкин, дейди “Чегара билмас дарёлар” коалицияси координатори Евгений Симонов.
Роғун ГЭС лойиҳасида иштирок этишни режалаштирган барча халқаро тараққиёт банкларига тегишли ҳужжат юборилган ва Жаҳон банки раҳбариятига йирик тўғонлар (шу жумладан Роғун ГЭС) қурилишини молиялаштириш хавфлари бўйича очиқ хат тақдим этилган. Унга дунёнинг турли мамлакатларидан 124 та жамоат ташкилотлари, шу жумладан “Чегара билмас дарёлар” экологик коалицияси имзо чеккан.
Изоҳ (0)