Тожикистонда электр энергиясидан ноқонуний фойдаланганлик учун жавобгарликни кучайтириш мақсадида Жиноят кодексига ўзгартиришлар киритилди. Бу ҳақда AsiaPlus хабар берди.
Парламент қуйи палатаси 2 апрель куни Жиноят кодексига ўзгартиришларни қабул қилди. У президент Эмомали Раҳмоннинг топшириғи асосида Адлия вазирлиги томонидан тайёрланган.
Ўзгартиришлар жарима ёки 3 йилгача қамоқни, агар қилмиш катта миқдорда содир этилган бўлса, 6 йилгача озодликдан маҳрум қилиш жазосини назарда тутади. Шунингдек, қилмиш уюшган гуруҳ ёхуд жиноий уюшма томонидан содир этилган бўлса, 6 йилдан 10 йилгача қамоқ жазоси белгиланади.
Тузатишлар Жиноят кодексининг “Алдов ёки ишончни суиистеъмол қилиш йўли билан мулкий зарар етказиш” моддасига киритилган. Адлия вазири Музаффар Ашуриён лойиҳани депутатларга тақдим этар экан, истеъмолчиларнинг электр энергияси учун тўловдан қочиш мақсадида ҳисоблагич кўрсаткичларини ўзгартириши ёки ҳисоблагичларни четлаб ўтиб уланиш ҳолатлари мавжудлигини айтди.
Оқибатда республиканинг иқтисодий манфаатларига жиддий зарар етказилмоқда, деди вазир.
Эмомали Раҳмон 27 март куни бўлиб ўтган ҳукумат йиғилишида “электр энергиясидан оқилона фойдаланилмаётгани” ҳақида ташвишини билдирди. Раҳмон электр энергиясидан ноқонуний фойдаланиш ва унинг учун тўловларни амалга оширмаслик учун жиноий жавобгарлик белгилаш бўйича кўрсатма берди.
Тожикистон ҳукумати мунтазам равишда аҳолини электр энергияси бўйича қарзларнинг ортиши ва ноқонуний уланишларда айблайди. “Барки Тожик” давлат энергетика холдинги маълумотларига кўра, 2025 йил бошига келиб аҳолининг қарзи 1,7 миллиард сомонийни (155 миллион доллардан ортиқ) ташкил этган.
Илгари “Озодлик радиоси” журналистлари билан суҳбатда тожикистонликлар биллинг ҳисоблагичлари ўрнатилгандан сўнг улар тўловларни ўз вақтида амалга ошираётганини, акс ҳолда электр энергияси узиб қўйилишини таъкидлаган эди. Мутахассислар ҳам бу рақамларнинг ҳақиқийлигига шубҳа билдириб, муаммо фуқароларнинг қарзларида эмас, балки энергетика соҳасининг самарасиз бошқарувида эканини айтди.
Бундан ташқари, исмини ошкор қилишни истамайдиган энергетика назоратчиларининг ўзлари “Озодлик”ка айтишича, тўланмаган асосий қарзлар оддий фуқароларга эмас, балки юқори лавозимли амалдорлар билан боғлиқ йирик компанияларга тўғри келади.
Изоҳ (0)