Қашқадарё вилояти Муборак туманида ухлаб қолган Nexia ҳайдовчиси ички ишлар ходимлари бўлган машина билан тўқнашди. Ҳолат юзасидан Бош прокуратура “Дарё”га маълумотларни тақдим этди.
Унда келтирилишича, мазкур ҳолат юзасидан 6 апрель куни Муборак туман прокуратураси томонидан Жиноят кодексининг 266-моддаси 3-қисми “а” банди билан жиноят иши қўзғатилган.
Жиноят иши доирасида суднинг 7 апрелдаги ажримига кўра, бир нафар шахсга нисбатан қамоққа олиш тарзидаги эҳтиёт чораси қўлланган. ЙТҲ оқибатида бир нафар ИИБ профилактика инспектори воқеа жойида, яна бири шифохонада вафот этган, учинчи ходим ҳозирда шифохонада даволанмоқда.
Бундан аввал Самарқандда ЙПХ ходимининг қонуний талабига бўйсунмасдан инспекторнинг ҳаёти учун хавфли ҳаракатлар содир этган ҳайдовчига жазо тайинланган эди. Шунингдек, Фарғона шаҳрида Gentra ҳайдовчиси ЙПХ ходимининг талабига бўйсунмай, ходим устига машинани бошқаргани хабар қилинганди.
Қашқадарё вилояти Шаҳрисабз шаҳрида ички ишлар органи ходимининг овқатланиб ўтирган жойига бостириб кириб, тасвирга олган ва ижтимоий тармоқларга тарқатганларга чора кўрилганди. Шунингдек, Тошкентда ички ишлар ходимини ўлдириб, ёқиб юборган 3 эркакка ҳукм ўқилгани тўғрисида хабар берилган эди.
Изоҳ (0)