Xiaomi корпорацияси акциялари Гонконгдаги савдоларда ҳайдовчига ёрдам бериш тизимидан фойдаланган электромобиль ЙТҲга учрагани ҳақидаги хабарлардан сўнг 5,5 фоизга арзонлашди.
Xiaomi компанияси Weibo ижтимоий тармоғида SU7 русумли электромобиль 29 март куни Анхой вилоятидаги тезюрар автомагистралда аварияга учраганини тасдиқлади. Расмий баёнотда жабрланганлар борлиги айтилмаган, бироқ Хитой ОАВлари уч киши ҳалок бўлгани ҳақида хабар бермоқда.
Компания полиция воқеа тафсилотларини аниқлаётганини маълум қилди.
Дастлабки ҳисоботга кўра, ҳайдовчига ёрдам бериш тизими авариядан 20 дақиқа олдин фаоллаштирилган ва бир неча бор рулни ушлаб туриш кераклиги ҳақида огоҳлантирган. Ҳайдовчи бошқарувни ўз қўлига олганидан бир неча сония ўтиб, тўқнашув юз берган.
Маҳаллий ОАВ маълумотларига кўра, зарбадан сўнг электромобилда ўт чиққан ва кузовнинг катта қисми шикастланган.
Мутахассислар авария автоном ҳайдаш технологиялари хавфсизлиги бўйича саволлар туғдирмоқда, деб таъкидламоқда.
2024 йилда Xiaomi SU7 Series электромобиллари етказиб берилиши 136 854 донани ташкил этган. Март ойида компания 2025 йил учун башоратини 300 мингдан 350 минг донагача оширган.
Изоҳ (0)