Андижон вилояти Шаҳрихон туманида 13 апрель куни фуқаролар ва ички ишлар ходими ўртасида муштлашув содир бўлди. Вилоят Ички ишлар бошқармаси ҳолат юзасидан муносабат билдирди.
Маълум қилинишича, инспектор-психолог майор С.Камолитдинов “Эшонқишлоқ” маҳалласида хизмат олиб бораётган вақтида ҳудуддан 2004 йилда туғилган фуқаро Ш.Ш. бошқарувидаги Labo йўл ҳаракати қоидаларини қўпол равишда бузиб ҳаракатланган.
Бундан ташқари, машина юкхонасида икки нафар вояга етмаган болалар олиб кетилаётгани кўриб аниқланган. Инспектор шу сабабли машинани тўхтатишга ҳаракат қилган. Автомашина ҳайдовчиси болалар юкхонадан тушиб қолиши билан воқеа жойидан яширинган.
Шундан сўнг ҳолатни расмийлаштириш мақсадида майор С.Камолитдинов ва ҳудуд профилактика инспектори капитан Д.Қосимов “Қуруқсой” маҳалласидаги ҳуқуқ-тартибот масканига келган. У ерга ҳайдовчи, унинг акаси ва таниши келиб, ходимларнинг ҳаракатига кескин қаршилик кўрсатган ва уларни ҳақорат қилиб, тан жароҳати етказган.
Тиббий хулосага кўра, майор С.Камолитдиновга “бош юмшоқ тўқималарининг лат ейиши, чап елка ички юзаси юмшоқ тўқималари лат ейиши, кўкариши, милк юмшоқ тўқималарининг лат ейиши” ташхиси қўйилиб, фуқаро Б.Ш.да “бўйин олд қисмида шилинма жароҳати” мавжудлиги аниқланган. Labo ҳайдовчисига нисбатан Маъмурий жавобгарлик тўғрисидаги кодекснинг 128-моддаси билан маъмурий баённома расмийлаштирилган.
Воқеа иштирокчилари Ш.Ш., Б.Ш. ва Ж.Б.га нисбатан юқоридаги кодекснинг 183-моддаси (майда безорилик) ва 194-моддаси (ички ишлар органлари ходимининг қонуний талабларини бажармаслик) ҳамда Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) билан ҳужжатлар расмийлаштирилиб, прокуратура органлари томонидан терговга қадар текширув ҳаракатлари олиб борилмоқда. Шунингдек, ходимларнинг ҳаракатларига ҳуқуқий баҳо бериш мақсадида хизмат текшируви тайинланган.
Изоҳ (0)