Андижонда ЙПХ ходимининг қонуний талабига бўйсунмасдан, уни уриб юрган Spark ҳайдовчиси ҳайдовчилик гувоҳномасидан маҳрум қилинди. Бу ҳақда ЙҲХБ матбуот хизмати хабар берди.
Маълум қилинишича, ҳолат 30 март куни Андижон тумани, “Ўрикзор” маҳалласидан ўтган автомобиль йўлида содир бўлган.
Таъкидланишича, 1989-йилда туғилган ҳайдовчи ўзининг Spark русумли автомобилини бошқариб кетаётганда дастлаб рул бошқарувини йўқотиб, светофорнинг қизил чироғида тўхтаб турган яна бир Spark автомобилининг орқа қисмига урилиб, йўл транспорт ҳодисаси содир қилган. Бироқ ҳайдовчи воқеа жойидан кетиб қолган. Жабрланувчи ҳолат юзасидан ички ишлар бўлими ходимларига мурожаат қилган.
Мурожаатга асосан ЙПХ ходимлари Spark автомобилини тўхтатиш учун ҳаракат қилишган. Аммо ҳайдовчи тўхтатиш ишорасига қарамасдан, ходимларнинг қонуний талабларини бажармаган ва ЙПХ ходимини уриб юбориб, ҳаракатланишда давом этган.
Spark русумли автомобиль ҳайдовчиси маст ҳолатда бўлган ва ҳозирда ҳайдовчилик гувоҳномасидан маҳрум этилган, дейилади хабарда.
Қўшимча қилинишича, ҳолат юзасидан ҳужжатлар расмийлаштирилиб, судга тақдим этилган.
Изоҳ (0)