Jinoyat ishlari bo‘yicha Mirzo Ulug‘bek tuman sudida Ichki ishlar vazirligi xodimini bo‘g‘ib o‘ldirib, yoqib yuborgan shaxslarga nisbatan hukm o‘qildi.
Ma’lum bo‘lishicha, hodisa 2022-yilning sentabr oyida sodir bo‘lgan. Sudlanuvchilaridan biri ichki ishlar xodimini bo‘g‘ib o‘ldirgan, yana bir sudlanuvchi esa murdani yoqib yuborgan.
“Tilla do‘konida ishlaydigan inson katta miqdordagi qarzini qaytarmaslik uchun ishxonasiga qarashli mashinasiga ukamni aldab chaqirgan va qasddan o‘ldirgan. Ular ukamni tajovuzkorona bo‘g‘ib o‘ldirib, yoqib yuborgan va kanalga tashlab ketishgan.
Uch kun deganda topildi. Mana shu vahshiylarga nisbatan bir umrlik qamoq jazosini berishingizni talab qilamiz. 4 farzand ota mehriga zor — hali kichigi 1 yoshga ham to‘lmagan edi”, — deydi marhumning opasi.
“To‘satdan ro‘y berdi. Men buni bilmagan edim. Qattiq stressda qo‘rqib ketib, o‘zimni boshqarolmay qoldim. Mashinani o‘zim haydab ketganman. Eski tanishim orqali jinoyat sodir qilganman. Marhum yoqib yuborilgan. Sherigim uni nima uchun o‘ldirmoqchi bo‘lganiga javob bera olmayman”, — deydi sudlanuvchilardan biri.
Hukmga ko‘ra, sudlanuvchilardan biri Jinoyat kodeksining 97-moddasi 2-qismi va 164-modda 4-qismida nazarda tutilgan jinoyatlarni sodir etganlikda aybli deb topildi va 24 yil 1 oy muddatga ozodlikdan mahrum etildi. Shuningdek, u o‘ta xavfli retsidivist, deb topilgan. Shuningdek, 1986-yilda tug‘ilgan sudlanuvchi 24 yil muddatga, 1987-yilda tug‘ilgan sudlanuvchi esa 23 yil muddatga ozodlikdan mahkum qilingan.
Izoh (0)