Покистон шимоли-ғарбида 26 март куни тонгда юзага келган худкушлик ҳужуми оқибатида камида беш нафар Хитой фуқароси ҳалок бўлган. Бу ҳақда Anadolu нашри хабар берди.
Хабарда айтилишича, Хайбер-Пахтунхва провинциясининг Шангла туманида портловчи модда ортилган машина Хитой фуқароларини олиб кетаётган кортежга бориб урилган. Оқибатда 5 нафар хитойлик ва уларни олиб кетаётган покистонлик ҳайдовчи воқеа жойида вафот этган.
Воқеа ҳақида дастлаб Малакунд вилояти бош инспектори ўринбосари Муҳаммад Али маълум қилган. Инспектор текширув ишлари давом этаётганини маълум қилган.
Ҳалокатга учраган хитойлик муҳандислар Исломободдан Хайбер-Пахтунхва вилоятининг Юқори Коҳистон туманидаги Дасу шаҳрига кетаётган бўлган.
Ҳозирча ҳеч қайси террористик ташкилот хитой фуқароларига ҳужум учун жавобгарликни бўйнига олмаган. Жиноятни содир этганлар ҳам воқеа жойида ҳалок бўлган.
Бундан олдин, 2021 йил июль ойида Хайбер-Пахтунхва вилоятининг Коҳистон туманида ҳам худкушлик ҳужуми оқибатида тўққиз нафар Хитой фуқароси ҳалок бўлган эди.
Изоҳ (0)