Фарғона вилояти Учкўприк туманида ЙПХ ходими Spark ойнасини уриб синдиргани тўғрисида хабар берилганди. Вилоят ИИБ ЙҲХБнинг маълум қилишича, инспекторнинг қонуний талабига бўйсунмаган ҳайдовчига 5 сутка мамурий қамоқ жазоси тайинланган.
Маълум қилинишича, 14 апрель куни Бекобод қишлоғида давлат рақам белгисиз, ён ойналари туси ўзгартирилган Spark ҳаракатланиб бораётгани ҳақида хабар келиб тушган. Шундан сўнг инспектор А.А. автомобилни тўхтатиш чораларини кўрган. Лекин ҳайдовчи Ж.Ж ходимнинг тўхташ ва автомашинадан тушиш ҳақидаги қонуний талабларига бўйсунмаган.
Ушбу вазиятда инспектор буйруқ талабларига асосан куч ишлатиб, автомобиль ойнасини синдириб, ҳайдовчини тўхтатиб қолган. Мазкур ҳолат юзасидан ҳайдовчига нисбатан Маъмурий жавобгарлик тўғрисидаги кодекснинг тегишли моддалари билан ҳужжатлар расмийлаштирилиб, автомобиль жарима майдонига жойлаштирилган.
Тўпланган ҳужжатлар ҳолатга қонуний баҳо бериш учун жиноят ишлари бўйича Учкўприк туман судига юборилган.
“Кўчанинг бошидаги устахонага чиқиб, номерни қўйиб оламан дегандим. Ярим километр юрганимдан кейин тўхтатишди, тўхтадим. Қўрқиб кетганимдан эшикни очмасдан, ойнани тушириб гаплашдим”, — дейди ҳуқуқбузар.
Ҳайдовчи Маъмурий жавобгарлик тўғрисидаги кодекснинг 183-(майда безорилик) ҳамда 194-моддалари (Ички ишлар органлари ходимининг қонуний талабларини бажармаслик) билан 5 сутка маъмурий қамоқ жазоси тайинланди.
Изоҳ (0)