Америкалик журналист Жеффри Голдберг iPhone алгоритмидаги хато туфайли АҚШ президенти Дональд Трамп маъмуриятининг махфий Signal чатига кириб қолган. Бу ҳақда Британиянинг The Guardian газетаси Оқ уйнинг ички тергови натижаларига асосланиб хабар бермоқда.
Нашр маълумотларига кўра, Уолц журналистнинг рақамини адашиб қўшмоқчи бўлган бошқа одам номи остида сақлаб қўйганидан сўнг, уни Ямандаги Америка операциялари муҳокамаси учун Signal’даги чатга қўшган.
Таъкидланишича, The Atlantic журнали бош муҳаррири Жеффри Голдбергни бошқа шахснинг контакт карточкасига қўшишни Уолцга iPhone таклиф қилган. Қурилма алгоритми Голдбергнинг телефон рақами билан ҳозирда АҚШ Миллий хавфсизлик кенгаши матбуот котиби лавозимини эгаллаб турган Брайан Хюзнинг алоқа маълумотлари ўртасида хато боғлиқликни кўрган.
Маълум қилинишича, Жеффри Голдбергнинг телефон рақами ўтган йилнинг октябрь ойида АҚШ президентининг миллий хавфсизлик бўйича маслаҳатчиси Майк Уолцга етиб борган.
Айнан ўша пайтда Трампнинг матбуот котиби Брайан Хюз Уолцга журналист ёзмоқчи бўлган мавзулардан бири бўйича Голдбергнинг сўровини юборган. Хюз Уолцга йўллаган электрон хатида ўз имзоси ёнида Голдбергнинг рақамини кўрсатган.
“Уолц охир-оқибат Голдбергга қўнғироқ қилмаган, бироқ ғалати тасодиф туфайли Голдбергнинг рақамини билмай туриб iPhone’ида сақлаб қўйган — ҳозирда миллий хавфсизлик кенгаши матбуот котиби бўлган Хюзнинг контакт номи остида” дея ёзади The Guardian.
Бу “ғалати тасодиф”, чамаси, iPhone алгоритмининг номукаммаллигига боғлиқ бўлган.
Рақам Уолцнинг iPhone’и ёрдамида “контакт таклифини янгилаш” пайтида хатолик туфайли сақланиб қолган, дея таъкидлайди нашр.
Гап iPhone илгари номаълум бўлган рақамни смартфон у билан боғлиқ бўлиши мумкин деб ҳисоблаган мавжуд контактга бириктириш функцияси ҳақида кетмоқда.
Бу Голдбергнинг Америка ҳукуматининг махфий гуруҳ чатига тасодифан кириб қолишига сабаб бўлган — президент маслаҳатчиси у ерга МХК котибини киритмоқчи бўлган.
24 март куни The Atlantic журнали бош муҳаррири Жеффри Голдберг уни адашиб Signal мессенжеридаги АҚШ ҳукуматининг махфий чатига қўшиб қўйишганини маълум қилди. Натижада журналист АҚШнинг юқори мартабали амалдорлари Ямандаги ҳарбий операция тафсилотларини муҳокама қилаётганига гувоҳ бўлган.
Изоҳ (0)