АҚШ Халқаро жиноий суд прокурори Карим Хонга қарши санкция қўллади. У Россия президенти Владимир Путин ва Исроил бош вазири Биньямин Нетаньяхуни ҳибсга олишга ордер берганди. Тегишли баёнот АҚШ Молия вазирлиги Хорижий активларни назорат қилиш бошқармаси (OFAC) сайтида эълон қилинди.
Трамп февраль ойида Халқаро жиноий судни АҚШ ва Исроилга ноқонуний ҳужумлар қилганликда айблаганди. Шундан сўнг ХЖСга қарши санския киритганди. Ҳужжатда таъкидланишича, ХЖС АҚШ ва Исроилга қарши “қонунга хилоф ва асоссиз ҳаракатлар” содир этган ҳамда “ҳеч қандай қонуний асосларсиз ўз юрисдикциясини эълон қилган ва Қўшма Штатлар фуқаролари ҳамда уларнинг айрим иттифоқчилари, жумладан, Исроилга нисбатан дастлабки терговни бошлаган”.
Бундан ташқари, ХЖС “ваколатларини суиистеъмол қилиб, Исроил бош вазири Биньямин Нетаньяху ва собиқ нудофаа вазири Йоав Галлантни ҳибсга олишга асоссиз ордерлар берган”ликда айбланган. Шу сабабли эндиликда Карим Хонга қарши санкция қўлланмоқда.
2023 йил март ойида ХЖС Владимир Путинни ҳибсга олишга ордер берди. Ордер болаларни Украинадан Россияга ноқонуний депортация қилиш билан боғлиқ эди. Бундан ташқари, Халқаро жиноий суд аввалроқ Путиннинг бошқа “ҳарбий жиноятлари” бўйича тергов олиб бораётганини маълум қилганди.
Нетаньяху ва Галантани ҳибсга олиш ордери
21 ноябрь куни Халқаро жиноий суд веб-сайтида бир вақтнинг ўзида икки исроиллик сиёсатчи — бош вазир Биньямин Нетаньяху ва ўша пайтдаги мудофаа вазири Йоав Галантга нисбатан ҳибсга олиш ордерини бериш тўғрисида баёнот пайдо бўлди. Ордер 2023 йил 8 октябрдан 2024 йил 20 майгача бўлган даврда Ғазода содир этилган ҳарбий жиноятлар учун берилган.
Айбловлар Исроил ҳукумати ва қуролли кучларининг Фаластин аҳолисига, хусусан, Ғазо секторидаги тинч аҳолига қарши ҳаракатларига тааллуқли. Исроил бош вазири идораси бу қарорни антисемитизм деб атаган, буйруқ берган органнинг ўзини эса “нохолис ва камситувчи” деб таърифлаган. Шу билан бирга, Европа комиссияси раиси ўринбосари Жозеп Боррел ХЖС қарори Рим статутини имзолаган барча давлатлар учун мажбурий эканини таъкидлаган.
Путинни ҳибсга олиш ордери
2023 йил март ойида Гаагадаги Халқаро жиноий суд Россия президенти Владимир Путин ва болалар омбудсмани Мария Лвова-Беловани ҳибсга олишга ордер берди. Улар Украинанинг босиб олинган ҳудудларидан болаларни ноқонуний депортация қилиш ва Россия ҳудудига ноқонуний кўчиришда айбланмоқда. Жиноятлар, суд маълумотларига кўра, 2022 йил 24 февралдан бери содир этилган.
Кремль бунга жавобан Россия Халқаро жиноий суд юрисдикциясини тан олмаслигини айтган. Ўша пайтда АҚШ президенти бўлган Жо Байден ХЖС қарори асосли эканини айтганди.
Изоҳ (0)