Украина расмийлари шу ҳафта охирида АҚШга ташриф буюриб, фойдали қазилма конларини ўзлаштириш ва инфратузилмани тиклаш бўйича урушдан кейинги режаларни тартибга солувчи келишув бўйича музокаралар олиб боради. Бу ҳақда Bloomberg агентлиги хабар бермоқда.
Агентликнинг қўшимча қилишича, Украина Вашингтон билан кутилаётган келишувда яхшироқ шартларга эришишга ҳаракат қилмоқда.
Делегация таркибига Украина иқтисодиёт ва адлия вазирлари ўринбосарлари киради, бироқ юқори мартабали амалдорлар йўқ, чунки бу босқичда президент Дональд Трамп маъмурияти билан музокаралар техник маслаҳатлашувларни талаб қилади. Шунингдек, Киев музокаралар бўйича маслаҳат бериш учун халқаро юридик фирмани жалб қилди, дейди агентликнинг икки расмий манбаси.
Манбаларнинг айтишича, ташриф 11—12 апрель кунлари бўлиб ўтиши керак. Ташқи ишлар вазирлиги вакили ташриф амалга оширилишини тасдиқлаган, бироқ қўшимча тафсилотларни келтиришдан бош тортган.
Изоҳ (0)