Томошабинлар “Қўрғон сирлари”нинг учинчи мавсумини сабрсизлик билан кутган эди. Бир неча мавсум давомида томошабинни сюжет бурилишлари, кескин диалоглар ва мураккаб образлар билан ўзига ром этган сериалдан кутилган умидлар жуда катта бўлган. Аммо янги мавсум эфирга узатилиши билан мухлислар ҳайратда қолди: бу аввалги мавсумларнинг давомими ёки бутунлай бошқа ҳикоями?
Сценарий муаллифлари гўёки илгари яратилган воқеалар занжирини унутиб, янги саҳифани очишга қарор қилгандек. Натижада бир нечта муҳим воқеалар тушунтирилмасдан ўтказиб юборилди, асосий қаҳрамонлар ўз характерларига ёт ҳаракатлар қила бошлади, вақт оралиғидаги узилишлар эса сюжетни янада чалкаштириб юборди.
Ушбу мақолада биз “Қўрғон сирлари”нинг 3-мавсумида йўл қўйилган энг катта 7 та сценарий хатоликни кўриб чиқамиз
- Учинчи мавсумда аввалги сюжет ҳисобга олинмаган
“Қўрғон сирлари”нинг учинчи мавсумида содир бўлган ҳамма воқеалар аввалги икки мавсумни худди йўққа чиқаргандек бўлди. Иккинчи мавсум якунида Сейраннинг ҳушидан кетишидан олдин айтган таъсирли нутқи ёдингиздами?
Бу сўзлар жуфтини телба каби севувчи, бахти учун охиригача курашишга тайёр қизнинг изҳорлари эди. Аммо учинчи мавсумда Сейран бутунлай ўзгача қиёфада намоён бўлди. Ферит ва Сейран жуда майда ишлар туфайли осонликча ажрашиб кетиши мантиққа зид бўлди.
- Ферит ва Сейраннинг фарзанд кутаётган давридаги муносабатлари кўрсатилмаган
“Қўрғон сирлари” мухлислари Сейраннинг ҳомиладорлик даври ва Ферит иккисининг самимий ва меҳрга тўла кадрларини кутишган эди. Аммо ҳомиладорлик эълон қилинган саҳнадан сўнг, тўсатдан беш ёшли Дуру ҳақида ҳикоялар бошланиб кетади.
- Суна ва Абидин қандай қилиб яна топишиб олишгани тушунтирилмаган
Биринчи мавсумда уларнинг муносабатлари беғубор ва самимий севги сифатида кўрсатилди. Иккинчи мавсумда уларнинг йўллари турли томонга ажралади. Сўнг Суна ёнида Каё пайдо бўлади. Бироқ кутилмаганда учинчи мавсумда аввалги мавсумдаги жуфтлик яна қайтиб қолади. Аммо бу нима сабабдан юз бергани, бу вақтда яна қандай воқеалар ривожи бўлганига ҳеч қандай изоҳ берилмади. Натижада уларнинг оилавий ҳаёти сунъий ва сохта бўлиб туюлди. Бу эса томошабинларда ёқимсиз таассурот қолдирди. Айниқса, Каёнинг сирли тарзда йўқолиб кетиши тушунарсиз чиққан.
- Антагонист ролидаги Чичек бутун сериал концепциясини барбод қилди
Дастлабки икки мавсумда Сейран ва Ферит уларнинг муносабатларига қарши одамлар билан курашиб келди. Аммо учинчи мавсумда Абидиннинг онаси Чичек асосан Халисга қарши курашди, унинг мақсади Абидинни қайтариб, Корханларнинг бойлигини қўлга киритиш эди. Сейран ва Феритнинг ажралиши унинг асосий нишони эмасди. Натижада сериалдаги драма камайди ва рейтинглари пасайиб кетди.
- Тарик ва Саффетни учинчи мавсумга жуда кеч ва ҳеч қандай изоҳсиз киритишди
Иккинчи мавсум охирида уларни Халис йўқ қилиб юборгандек эди. Аммо учинчи мавсумда қаҳрамонлар яна пайдо бўлди. Унда нега Тарик Дурунинг туғилганига беш йил ўтгачгина болани ўғирлашга қарор қилади? Шунча йиллар ичида у нималар билан банд эди? Режиссёрлар бунга сериалда ҳеч қандай жавоб беришмаган.
- Корханларнинг гуллаб-яшнаётган бизнеси нега бирдан муваффақиятсизликка учради?
Корханларнинг заргарлик бизнеси нафақат Туркияда, балки хорижда ҳам эътироф этилган эди. Бироқ учинчи мавсумда бирдан Феритнинг бошига молиявий ташвишлар тушади ва бутун бошли оила ичида айнан у барча муаммоларни ҳал қилишга мажбур бўлиб қолади. Аввалги мавсумда хорижий инвесторлар билан имзоланган шартномалардан асар ҳам қолмади. Натижада томошабинлар бундай чалкаш сюжетли сценарийни ижобий қабул қила олмади.
Изоҳ (0)