Турк продюсерлари ва менежерлари нега ҳис-туйғулардан даромад олишни шунчалик ёқтиришади? “Қўрғон сирлари” сериалидаги Афра Сарачоғлу ва Мерт Рамазон Демир ҳамда “Қалбим эшигини қоқ” сериали юлдузлари Керем Бурсин ва Ҳанде Эрчел муносабатлари уюштирилганмиди?
1. Севги шов-шувли пиарлардан кўра анча яхши таъсир қилади (турклар буни яхши билишади)
Бош қаҳрамонлар аста-секин бир-бирига кўнгил қўядиган сериални томоша қилаётганингизда, иккала актёрнинг ё бахтли оила қурганини, ё ким биландир муносабатда эканини, ёки бир-бирига нисбатан ҳеч қандай туйғу сезмаслигини биласиз. Аммо тўқиб чиқарилган ҳикояда нафақат персонажларни, балки ўз ҳиссиётларини суратга олиш майдончаси ташқарисида бошдан кечираётган ҳақиқий инсонларни кўриш бутунлай бошқа масала.
Бундай усул нафақат менежерлар ва продюсерларга томошабинларда сериалдаги воқеалар ҳақиқатга яқин экани ҳақида таассурот уйғотишга ёрдам беради, балки томошабинлар ҳар бир қисмни диққат билан кузата бошлайдилар (ҳатто қайта-қайта томоша қилишлари мумкин). Улар юлдузлар қаерда рол ўйнагани ва қаерда ҳақиқий севгини бошдан кечираётганини кўриш умидида бўладилар.
Айтганча, Туркияда пиар-романлар фақатгина бирор фильм ёки сериалга эътибор тортиш учун қўлланилмайди. Бунга Серенай Сарикая ва Мерт Демир орасидаги, ҳамон кўплаб саволларга сабаб бўлаётган воқеа ажойиб мисол бўла олади.
Мусиқачи машҳур турк актрисаси билан муносабатидан сўнг анча танилди. Серенайнинг йигит билан пул эвазига учрашаётгани ҳақидаги шов-шувлар ва жанжал эса унга бўлган қизиқишни янада оширди.
Турк сериаллари ўзининг романтик комедиялари билан шуҳрат қозонгани туфайли бу ҳис-туйғу ҳаракатлантирувчи кучга айланди. Чунки экранда кўрсатиладиган бир кўришдаёқ севги ҳақидаги эртакнамо ҳикоялар билан улғайган томошабинлар бундай ҳолат ҳақиқий ҳаётда ҳам содир бўлиши мумкинлигига чин дилдан ва жуда соддалик билан ишонишади.
Афсуски, “Севги изтироби” сериали ижодкорлари бунинг уддасидан чиқа олмади, чунки Фаҳрие Эвжен суратга олиш жараёнида ҳақиқий тўполон уюштирди. Бу воқеа турк оммавий ахборот воситаларида Бурак Ўзчивит билан Неслиҳан Атагул ўртасида пайдо бўлаётган ҳис-туйғулар ҳақида ёзишни бошлаганларидан сўнг юз берди.
2. Пиар-романлар эътиборни нохуш ҳодисалардан чалғитишга ёрдам беради
Бу “Қўрғон сирлари” сериалининг учинчи мавсуми рейтинглари тез суръатда пасайишни бошлаган пайтда яққол кўринди. Ўша пайтда Мерт Рамазон Демир ва Афра Сарачоғлунинг ажралиши ҳақида хабарлар тарқалди. Мухлислар эътиборини севимли актёрларига қаратишди ва сериални янада синчковлик билан томоша қила бошлашди.
Худди шундай ҳолат “Қалбим эшигини қоқ” қаҳрамонлари Керем Бурсин ва Ҳанде Эрчел муносабатларида ҳам кузатилди. Иккинчи мавсум рейтингда пастлай бошлагач, сериал ижодкорлари улар ўртасида нимадир борлигига шама қилиб, юлдузларнинг таътилдаги суратларини эълон қилишди.
Бундай ёндашув туфайли иккинчи мавсум ҳам ўзини оқлади ва кўплаб мамлакатларга сотилди. Бироқ сериал тугаши билан деярли барча турк оммавий ахборот воситалари севимли қаҳрамонларнинг ажралиши ҳақида ёзишни бошлади.
3. Пиар-муносабатлар воситасида менежерлар “қўл остидагилар”га янги қиёфалар яратиб берадилар
Агар актёр ёки актриса одатий образига “ёпишиб қолса”, бундай пайтда ҳам пиар-роман қўл келади. Туркияда бундай ҳолат тез-тез учрайди, Керем Бурсиннинг қанчалик узоқ вақт Серкан Болат бўлиб қолганини эсланг. Айтганча, кўпчилик учун у ҳамон фақат шу образдаги эркак бўлиб қолмоқда.
Аммо у “Агар қаттиқ севсанг” сериалида Ҳафсанур Санжактутан билан ишлашни бошлаган пайтда ва интернетда жуда ҳам самимий кадр ортидаги расмлар пайдо бўла бошлаганда, у ниҳоят Атеш Аржали бўлиб танилди.
Албатта, ҳозирда ҳамманинг Ханде Эрчел ва Ҳакан Сабанжи ўртасидаги муносабатлар ҳақиқат эканлигига ишончи комил, бироқ дастлаб, қиз Туркиянинг энг машҳур миллиардери билан муносабат ўрнатишни бошлаганида, унга келадиган реклама таклифлари сони сезиларли даражада кўпайди.
Айтганча, Жан Яманнинг Демет Ўздемир билан севги муносабатлари ҳақидаги миш-мишлар ўз вақтида унинг обрўсини тиклашга ёрдам берган. Чунки 2015 йилдан 2017 йилгача турк матбуоти эътиборини актёрга қаратган эди. Бунга сабаб унинг “Биздан ким севмаган?” сериалидаги ҳамкасби Селин Сойдерга нисбатан айтган ножўя сўзлари эди. Обрўга путур етказувчи бу можаронинг тинчимайдигандек туюлишига қарамай, 2018 йилда “Тўрғай” сериали эфирга чиқди. Сериал устида ишлаш жараёнида Жан Деметга чиндан ҳам кўнгил қўйди.
Актёр доимо ҳамкасбининг энергиясини мақтаб, унинг истеъдодини таъкидлаб турарди. Бир оз вақт ўтгач, уларнинг учрашиб юрганлари ҳақида миш-мишлар тарқалди. Баъзилар бу шунчаки пиар эмас, балки ҳақиқий ҳис-туйғулар эканлигига ишонди. Бироқ сериал якунига етиши билан бу севги тарихи ҳам тугади. Шундай бўлса-да, Жан Яман кетма-кет келган можаролардан сўнг ўз мавқейини тиклашга эришди, Демет Ўздемир эса янада машҳур бўлди.
Изоҳ (0)