Қирғизистон Миллий хавфсизлик қўмитаси раиси Қамчибек Ташиев грек ёнғоқлари қирғизларга тегишли эканини айтиб, уни қирғиз ёнғоғи деб номлашга чақирди.
Ташиев дунёдаги энг катта ёнғоқ ўрмони Қирғизистонда жойлашганини таъкидлади.
Ёнғоқлар бизда минг йиллар давомида ўсган ва дунёдаги энг катта ёнғоқ плантацияси шу ерда жойлашган. Мамлакатимиздан ёнғоқ бутун дунёга тарқалган: уни грек, турк, испан, венгер ёнғоғи деб ҳам аташган, лекин аслида у биздан келиб чиққан. Менимча, бундан буён биз уни қирғиз ёнғоғи деб аташимиз лозим.
Айниқса, маҳаллий ҳокимият органлари, вилоят ҳокимлари, туман ҳокимлари, Фавқулодда вазиятлар вазирлиги, Ўрмон хўжалиги шундай аташи керак. Шунда биз тарихий адолатни тиклаймиз. Биз — қирғизлар — ўзимизни улуғлашни билмаймиз, грекча бўлса, яхши деб ўйлаймиз. Йўқ, ундай эмас. “қирғиз ёнғоғи” брендини яратишимиз зарур, деди Ташиев.
31 март куни Жалолобод вилоятида 100 гектар майдонга 40 минг туп кўчат экилди. Ташиевнинг юқоридаги баёноти айнан шу тадбирда янгради. У келажакда бу кўчатлар ҳақиқий ўрмонга айланишини айтди.
Биз ўзлигимизни, қадриятимизни ерга урдик. Ҳозир фарзандларимиз, невараларимиз улғайяпти, биз уларга энг қимматли нарсаларни мерос қилиб қолдиришимиз керак. 50 йилдан кейин бу жойда невара-чевараларим ўйнайди. Неваралар: “Бу дарахтларни ота-боболаримиз ўтқазган” дейди. Барча авлодларимиз шундай дейди, дея хулоса қилди Ташиев.
Жалолобод вилоятининг 100 гектар чўл ҳудудида 7 турдаги, жумладан, ёнғоқ, писта, бодом, олма, қарағай, ўрик, шунингдек, игнабаргли ва баргли дарахтларнинг 40 минг туп кўчати экилмоқда.
Изоҳ (0)