Қайси турк актёри сериалнинг бир қисмида суратга тушиш учун 40 минг доллар олади?  

Хорижий матбуот маълумотларига кўра, ҳозирда бутун дунёда машҳур ва бой бўлган турк сериаллари юлдузларининг рўйхати тузилди ва улар қанча пул топиши, қаерга инвестиция қилиши ҳамда қандай уй-жой сотиб олиши ҳисоблаб чиқилди.

Бурак Ўзчивит (40 ёшда, уйланган, икки ўғли бор)

“Чолиқуши”, “Муҳташам юз йил”, “Севги изтироби”, “Ҳукмдор Усмон” сериалларининг юлдузи Бурак Ўзчивит яхши пул ишлаши маълум. Туркия кино саноатида иш ҳақини суратга олиш кунлари учун эмас, балки қисмлар бўйича ҳисоблайдилар (бир қисмни 5 дан 8 кунгача суратга олишлари мумкин). Бурак Ўзчивит бир қисм учун камида 6 500 доллар, максимал 11 000 доллар олади. Бу лойиҳанинг миқёсига, қисмлар сонига, шахсий манфаатларига, шартнома шартларига ва бошқа омилларга боғлиқ. “Ҳукмдор Усмон” сериалида у бир қисм учун 8 500 долларлик шартнома тузган. Турмуш ўртоғи, актриса Фаҳрие Эвженнинг сериал бир қисми учун иш ҳақи эса 3 900 доллар.

Ўзчивит ёшлигида модел бўлиб ишлаган ва ҳозир Туркия ҳаво йўллари, кийим-кечак брендлари, эркаклар косметикаси ва бошқа кўплаб маҳсулотларни реклама қилади. Унинг реклама шартномалари камида 80 000 долларга баҳоланади. Хорижий матбуотда Ўзчивитнинг бойлиги 70 миллион доллардан кўпроқ деб баҳоланади.

Бурак Ўзчивит кўчмас мулкка инвестиция қилади, қолганини эса банк ҳисобрақамларида сақлайди. Сўнгги олти ой ичида актёр Истанбулнинг элита туманларидан иккита уй сотиб олди. Оилага тегишли биринчи вилла 500 квадрат метр майдонга эга бўлиб, 2,3 миллион долларга сотиб олинган, иккинчи вилла эса 900 квадрат метр майдонга эга бўлиб, 4,2 миллион долларга сотиб олинган. Бурак оиласи кенг, 4 қаватли виллага кўчиб ўтди, иккинчи виллани эса ижарага беришмоқчи. Актёр Бодрумда 922 000 долларга сотиб олинган виллани кичик ўғли, 2 ёшли Керемга совға қилгани маълум бўлган. Эҳтимол, 5 ёшли Караннинг ҳам келажакда ўз уйи бўлиши мумкин.

Ҳанде Эрчел (31 ёшда, турмушга чиқмаган)

“Қалбим эшигини қоқ”, “Маликам, энди қара”, “Мутлақо бошқача” “Уни шамолга қолдиринг” сериаллари билан барчанинг қалбидан жой олган Ҳанде Эрчел турмушга чиқмаган. У “Қалбим эшигини қоқ” сериалидаги ҳамкори Керем Бурсин билан бир йилдан камроқ вақт учрашди. 2022 йилнинг декабридан бери у отасининг компаниясида директорлар кенгашига аъзо бўлган 33 ёшли турк миллиардери Ҳакан Сабанжи билан муносабатда. Бизнес денгиз ва ҳаво транспорти билан боғлиқ. Келажакда у оилавий бизнесни бошқаради. Сабанжи Ҳанде билан учрашгунга қадар ижтимоий ҳаётнинг қаҳрамони эди – моделлар билан учрашиб юрар эди. Дастлаб Сабанжи оиласи Ҳанде Эрчел билан муносабатни маъқуллашмади: бизнесменнинг онаси Арзу Сабанжи Ҳакан билан оила қуриш учун Ҳанде карьерасидан воз кечиши кераклигини айтган эди. Бироқ ўғлининг актриса билан бўлган муносабатлари узоқ муддатли эканлигини кўриб, Сабанжи оиласи Эрчелни қабул қилди. Аммо тўйдан ҳали ҳам дарак йўқ ва бу мавзуга оид саволларга актриса жавоб бермайди.

Келин ҳам бой. Унинг бойлиги камида 6 миллион 600 минг доллар деб баҳоланади. Юлдузнинг бир қисм учун гонорари 5 минг 300 доллардан бошланади. Лойиҳага қараб икки баравар кўпроқ ҳам бўлиши мумкин. Актриса, шунингдек, рекламада ҳам суратга тушади.

Инвестицияларнинг бири кўчмас мулкка киритилган. Ҳанде Эрчел Истанбулнинг элита туманларидан бирида икки қаватли виллани сотиб олди. Истанбулда шунга ўхшаш виллаларнинг нархи 1 миллион доллардан ошади. Кейин у уйда дизайнерлик таъмирини амалга оширди.

Ҳалит Эргенч (54 ёшда, учта фарзанди бор)

“Муҳташам юз йил” сериалидаги султон Сулаймон — Ҳалит Эргенч турк сериалларини севувчилар орасида энг машҳур қаҳрамон. Сериал 4 мавсум, 139 қисмдан иборат эди. Бош рол ижрочиси Ҳалит Эргенчнинг гонорари бошқа актёрлар орасида энг юқори — бир қисм учун 20 минг доллар эди. У сериалнинг бошқа мамлакатларда намойиш этилиши учун фоиз оладиган ягона актёр бўлиб, бу унинг ҳақини ўртача 2 бараварга оширган. Лойиҳанинг муваффақиятидан сўнг у фақатгина катта пулга суратга тушади. Ҳозирда унинг бир эпизод (қисм) учун ўртача иш ҳақи 14 000 доллар. Актёрнинг бойлиги илгари 5,5 миллион долларга баҳоланган.

Ҳалит Эргенч “Минг бир кеча” сериалида актриса Бергузар Корел билан бирга рол ўйнагани учун биринчи хотинидан ажрашган. Ҳозирда Ҳалит ва Бергузар учта фарзандни тарбияламоқдалар. Учинчи фарзанди туғилгандан сўнг улар Истанбулдан Лондонга кўчиб ўтишди, у ерда турк маҳалласидан уй сотиб олишди. Айтишларича, улар болаларининг таълими учун кўчиб ўтишган. Аммо улар икки йил яшаб, 2024 йилда Истанбулдаги элита туманида жойлашган уйига қайтишди. Улар дарҳол фильмларга суратга тушишга киришдилар, Лондонда эса ишсиз ўтиришган эди. Никоҳнинг бошида эр-хотин Бергузарга тегишли 160 квадрат метрлик ҳовли уйда яшашган. Эргенч юқори ҳақли юлдузга айланганидан сўнг, улар Истанбулнинг нуфузли туманларидан 200 квадрат метрлик ҳовуз ва террасали вилла сотиб олишди.

Ураз Кайгилароғлу (37 ёшда, ажрашган, қизи бор)

“Эгей денгизи балиғи”. “Элчининг қизи”, “Уч қуруш”, “Актриса” сериалларидаги роли билан танилган актёр Ураз беш йил давомида актриса Мелис Ишитен билан яшаб, 2019 йилда ажрашган ва қизларини биргаликда тарбиялаш учун дўст бўлиб қолишган. Ҳозирда актёрнинг севгилиси бор – у Уразнинг жанжалга аралашишига сабаб бўлган 28 ёшли фотограф Сайна Сулейманпур. Ураз қаллиғининг фотосурат кўргазмасининг бир қисмида рол ўйнаб, қизнинг ғоясини амалга оширган ва бунинг учун у аёлларга нисбатан шафқатсиз муносабатда бўлганликда айбланган. Ҳақиқат тезда ойдинлашди ва ҳамма бу воқеа ҳақида унутиб ҳам юборди.

Ураз Кайгилароғлунинг сериалларнинг бир қисм учун ўртача иш ҳақи 11 000 доллар. Маълумки, актёр собиқ хотини ва қизини уй-жой билан таъминлаган — уларга уй сотиб олган. Сўнг ўзи учун Истанбулнинг элита туманларидан бирида вилла сотиб олган. Уразнинг бойлиги миқдори номаълум. Кино билан бир қаторда у рекламада ҳам суратга тушади.

Керем Бурсин (37 ёшда, уйланмаган)

“Қалбим эшигини қоқ” сериалининг бош қаҳрамони Керем Бурсин қизлар орзусидаги куёв бўласа-да, ҳозирча оила қуришга муваффақ бўлмади. Ҳозирда у Ҳанде Эрчелнинг севгилиси Ҳакан Сабанжининг қариндоши бўлган қиз дўсти Мелис билан бахтли. Мелиснинг бобоси эса миллиардер ва ёзувчи Сакип Сабанжи.

Актёр Керем Бурсиннинг бир қисм учун иш ҳақи 4 000 доллардан бошланади. Бироқ у рекламадан анча катта миқдорда пул топади. Актёрнинг бойлиги 11 миллион долларга баҳоланади. Икки йил олдин Бурсин Истанбулнинг обрўли туманларининг биридан, Қора денгизга қараган уч қаватли уй сотиб олган.

Жан Яман (35 ёшда, уйланмаган)

“Тўрғай”, “Тўлин ой”, “Жаноб хато” сериалларининг бош қаҳрамонларидан бири Жан Яман яқинда Москвада “Эл Турко” сериалини тақдим этди. Туркия матбуоти хабар беришича, ушбу халқаро лойиҳада актёрнинг бир қисм учун гонорари рекорд даражада — 40 000 долларни ташкил этган. Туркиядаги гонорари эса ундан уч баравар кам эди. Беш йил олдин Жан Яман Истанбулдан Римга кўчиб ўтгани бежиз эмас — у халқаро карьера қуришга қарор қилган. Римда актёр нафақат янги ролларга таклифларни, балки бир нечта жаҳон брендлари билан реклама шартномаларини ҳам имзолади. Айтишларича, биргина Mercedes-Benz билан бўлган реклама шартномаси 1 миллион евро атрофида.

Жан Яманни энг ақлли турк актёри деб аташади. У Истанбулдаги италян лицейида яхши ўқиган, ҳатто энг аълочи ўқувчи сифатида стипендия олган, Истанбул университетининг юридик факультетини аъло даражада тамомлаган, йирик халқаро компанияда адвокат бўлиб ишлаган. Судда унинг таъсирли гапирганини кўрган дўстлари уни актёрлик агентларига тавсия қилишган. У турк, италян, инглиз тилларида эркин гапиради ва рол ўйнайди. Ҳозирда испан тилини ўрганмоқда, келажак режаларида рус тили ҳам бор.

Жан Яман Истанбулдан ота-онасига уй сотиб олган. Ўзи эса Римда Колизейга қараган кенг хонадонни ижарага олади. Аввалига актёр италян телебошловчиси билан ишқий муносабатда бўлган, сўнг қиз муносабатларни расмийлаштиришни истамагани учун ажрашишган, ҳозир эса актёр италян актрисаси билан муносабатда.