Москванинг “ЦСКА” клуби ярим ҳимоячиси Аббосбек Файзуллаев Туркиянинг “Галатасарой” клубидан бўлаётган қизиқишларга муносабат билдирди.
Футболчи Match TV телеканалига берган интервьюсида бу ҳақида гапиришни истамаслиги, сабаби унинг Москва клуби билан шартномаси борлигини айтди.
Бу ҳақда гапиришни истамайман, ҳозир вақти эмас. Менинг “ЦСКА” билан шартномам бор, бу мавзуда гапириш клубга нисбатан ҳурматсизлик бўлади. Ҳозир барча эътиборим “ЦСКА”га қаратилган, дея футболчининг сўзларини келтиради MatchTV телеканали.
Аввалроқ Туркиянинг Markaj News нашри “Галатасарой” ёзги трансфер ойнаси пайтида Файзуллаевни ўз таркибига қўшиб олиш имкониятини кўриб чиқаётгани ҳақида хабар берган эди.
Россия Премьер Лигасининг 22-туридаги баҳсда “ЦСКА” ўз майдонида Махачқалъанинг “Динамо” жамоасини қабул қилиб, 2:0 ҳисобида ғалаба қозонди. Учрашувни асосий таркибда бошлаган футболчи 87 дақиқа майдонда ҳаракат қилди.
Марко Николич бошқарувидаги жамоа 41 очко тўплаб, турнир жадвалида бешинчи ўринни эгаллаб турибди. Навбатдаги учрашувда “ЦСКА” ўз уйида Москванинг бошқа бир жамоаси “Динамо” билан тўқнаш келади.
Изоҳ (0)