Турк кино ва сериалларида асосан севги ёки жиноят мавзулари кўтарилади, деган янглиш тушунча мавжуд. Аммо бу ҳақиқатдан йироқдир. Турдизи оламида чуқур маънога эга, бир қарашда дарров англаш қийин бўлган ўткир сюжетли лойиҳалар ҳам кўп. Қуйида кутилмаган бурилишларга бой ва психологик жиҳатдан мураккаб бўлган турк сериалларини ҳавола этамиз.
“Никоҳ ҳақида барча ҳақиқатлар”
- “Кинопоиск”даги рейтинги: 8,4
- Жанр: драма
- Ролларда: Гекче Баҳадир, Сумру Явружук, Бертан Асллани ва бошқалар.
Тўрт опа-сингил Чўлпан, Азра, Гунеш ва Санем Истанбулга кўчиб ўтади ва юридик соҳада карьера қилади. Уларнинг барчаси ажрим жараёнлари билан шуғулланади. Қизларнинг ҳар бирининг шахсий ҳаёти турлича ривожланади. Чўлпан эридан ажрашган, Санем никоҳга умуман ишонмайди, Азра бахтли турмуш қурган, Гунеш эса севган инсонига турмушга чиқиш ҳаракатида. Бир куни опа-сингилларнинг ҳаётида кутилмаган воқеа содир бўлади: уларнинг отаси кўп йиллар олдин бошқа аёлни деб қизларнинг онасини ташлаб кетганди. Шунда қаҳрамонлар олдида ўз отасини кечириш ёки кечирмаслик танлови туради.
“Қизил хона”
- “Кинопоиск”даги рейтинги: 8,0
- Жанр: драма
- Ролларда: Биннур Кая, Гулчин Култур Шаҳин, Баран Жан Erasлан, Сезин Бозачи, Тулин Ўзен ва бошқалар.
Турли қаҳрамонлар, синиқ тақдирлар ва уларнинг барчасига битта психиатр ёрдам беришга тайёр бўлади. Ҳар бир қисмда томошабинлар қабулга келган янги қаҳрамон билан танишадилар. Мутахассис креслосида эса, “Қўрғон сирлари” сериалидаги Нукет ролидан таниш бўлган, мафтункор Биннур Кая ўтиради. Фильмда беморлар ҳаёти кўрсатилади, уларнинг муаммоларига чуқур кирилади ва психотерапевт билан биргаликда оғриқли занжирлардан қутулишга ёрдам берадиган ечим топишга ҳаракат қилинади.
“Фи. Чи. Пи”
- “Кинопоиск”даги рейтинги: 7,8
- Жанр: драма, мелодрама
- Ролларда: Серенай Сарикая, Озан Гувен, Меҳмет Гунсур ва бошқалар.
Туркия учун ноодатий ҳисобланган “Фи. Чи. Пи” сериалида таниш чеҳралар талайгина. Масалан, бош ролларни Меҳмет Гунсур ҳамда Ўзан Гувен ижро этган. Психологик триллер марказида истеъдодли психиатр Жан Манай туради. У муваффақиятли карьера қуриб, ўз соҳасининг ҳақиқий юлдузига айланган. Муаммо шундаки, унинг ҳам қалбида қоронғи томонлари бор ва бу томонлар унга балерина Дуру ёқиб қолган пайтдан бошлаб тобора аниқ кўрина бошлайди. У севиб қолади, лекин бу туйғу муҳаббатдан кўра кўпроқ қарамликка ўхшайди. Ахир Жан психологик ҳийлаларни яхши билади. Сўнг у Дуру ва қаллиғининг ҳаётини тун-у кун кузатишни бошлайди.
“Биз Истанбулда учрашдик”
- “Кинопоиск”даги рейтинги: 7,6
- Жанр: триллер, драма
- Ролларда: Ойку Караэл, Фатиҳ Артман, Фунда Эрйигит ва бошқалар.
Бу Истанбулда содир бўладиган жуда ғайриоддий ва қизиқарли воқеа ҳақидаги сериал. Унда саккизта қаҳрамоннинг ҳаёти бир-бири билан кесишади, аммо ҳикоянинг марказий қаҳрамони Мерем (Ойку Караел) бўлади. Ҳар бир қисмда хурофотларнинг зарарли таъсири, ижтимоий зиддиятлар, маданий тўқнашувлар, руҳий жароҳатлар ва инсоний амбициялари каби мавзулар ёритилади.
Фильм анъанавий мусулмон аёл Меремнинг қишлоқдан шаҳарга кўчиб ўтганидан сўнг психиатрга қатнай бошлаши билан бошланади. Унинг доимий ҳушдан кетишлари бу ташрифларнинг сабабига айланади.
“Биринчи ва охирги”
- “Кинопоиск”даги рейтинги: 7,6
- Жанр: драма, мелодрама
- Ролларда: Салиҳ Бадемжи, Ўзге Ўзбиринжи, Улаш Туна Астепе, Ҳазал Субаши.
Бутун бир оиланинг аламли парчаланиши ҳақидаги аччиқ ҳикоя. Дениз (Ўзге Ўзпиринчи) ва Бариш (Салиҳ Бадемчи) 10 йилдан бери бирга яшайди, лекин энди улар бахтни ҳис қилишмайди. Чексиз жанжаллар, танбеҳлар ва бир-бирларини эшита олмаслик эр-хотиннинг ажрашиш учун ариза беришига олиб келади. Бу қарор уларнинг ёш ўғлига ёмон таъсир кўрсатади. Қаҳрамонлар васийлик масалалари ҳақида баҳслашаётган бир пайтда томошабинлар собиқ жуфтликнинг муносабатлари тарихини: ёрқин танишувдан тортиб ҳамма нарса парчалана бошлаган фожиали дақиқагача бўлган вақтни томоша қилишади.
“Қоғоз уй”
- “Кинопоиск”даги рейтинги: 7,6
- Жанр: драма
- Ролларда: Эрдал Бешикчиўғлу, Нур Феттаҳўғлу, Тувана Туркай ва бошқалар.
Жиҳан жиноят ҳуқуқи ўқитувчиси, Айлин муваффақиятли адвокат, уларнинг учта ажойиб фарзанди бор: ўғли Мерт ва қизлари Жемре ва Мелиса. Қаҳрамонларнинг ҳаёти даҳшатли оқшомларнинг бирида, Жиҳан ва Эйлин ўз уйида аёл жасадини топгач, бутунлай ўзгаради. Жабрланувчи Жиҳаннинг севгилиси, қотил эса 16 ёшли Жемре бўлиб чиқади. Қизи қамалмаслиги учун эр-хотин жасадни боғга яширишга ва содир бўлган воқеа ҳақида сукут сақлашга қарор қилишади. Аммо кўп сирлар фош бўлади ва идеал оила қиёфаси қоғоз уй каби мўрт бўлиб чиқади.
“Шахсият”
- “Кинопоиск”даги рейтинги: 7,6
- Жанр: драма, детектив, криминал
- Ролларда: Жансу Дере, Ҳалук Билгинер, Режем Уста ва бошқалар.
Мазкур сериал Альцгеймер касаллигига чалинган қотил ҳақидаги ҳикоядир. Невра исмли аёл Истанбул полицияси қотиллик бўлимидаги ягона аёл ишчи бўлиб, бир кун келиб унинг йўли Агаҳ билан кесишади. Агаҳ 65 ёшли пенсионер, аввал суд-тиббиёт эксперти бўлиб ишлаган. Бироқ у тунда қотилга айланадиган атипик маняк бўлади. Афсонавий турк актёри Ҳалук Билгинер ушбу роли учун Эмми мукофотига сазовор бўлган.
Изоҳ (0)