Туркияда ва дунё бўйлаб машҳур бўлган сериаллар орасида янги рекорд ўрнатилди. “Муҳташам юз йил” ёки “Севги изтироби” каби лойиҳалар ҳам катта муваффақиятга эришган, аммо мазкур лойиҳа барча рейтингларда улардан ўзиб кетди. Гап “Ҳукмдор Усмон” сериали ҳақида кетмоқда.
Сериал сюжети
“Ҳукмдор Усмон” тарихий жанговар турк сериали ҳам Меҳмет Боздағ томонидан суратга олинган бўлиб, “Эртуғрул”нинг давомий қисми ҳисобланади. Сериал сюжети Эртуғрулнинг ўғли Усмон Ғозийнинг мустақиллик учун Салжуқийлар салтанатига қарши қандай курашгани ҳақида ҳикоя қилади. Империя яратиш учун Усмон ички душманларни мағлуб этиши, сўнгра кучли Мўғул ва Византия империялари билан тўқнашувга киришиши керак бўлади.
Рекорд кўрсаткичлар
“Ҳукмдор Усмон”нинг биринчи эпизоди эфирга узатилган пайтда янги рекорд ўрнатилди ва турк телевидениеси тарихидаги энг муваффақиятли бошланган сериал сифатида эътироф этилди. Биринчи қисмданоқ лойиҳа 15 миллиондан ортиқ томошабинларни экран қаршисига михлаб қўйди. Бугунги кунга қадар ҳеч қайси турк сериали бундай муваффақиятли стартни такрорлай олмади.
Сериал олти фаслдан бери давом этмоқда ва ҳар бир янги эпизоднинг рейтинги 6% дан пастга тушмаган. Бу рақам узоқ давом этадиган сериаллар учун ажойиб натижадир.
Лекин бу ҳаммаси эмас: Ҳиндистон ва Покистонда “Ҳукмдор Усмон” кўришлар сони бўйича Туркиядан ҳам ўзиб кетди. Ҳозирда сериал Альбанияда энг машҳур лойиҳа ҳисобланади.
Актёр Бурак Ўзчивит бош ролни ижро этган лойиҳани YouTube платформасида ҳам томоша қилиш мумкин. Бугунги кунга қадар у 5,5 миллиард марта кўрилган.
Изоҳ (0)