Одатда кундалик турмушда ишлатиладиган буюмларнинг арзон муқобилларини топганимизда қувончимиз ичимизга сиғмайди, чунки бу оила бюджетининг салмоқли қисмини тежаб қолиш имконини беради. Аммо баъзида бундай тежамкорлик кутилмаган оқибатларга олиб келиши мумкин. Натижада нафақат кўпроқ пул сарфлашга мажбур бўламиз, балки бу буюмлардан фойдаланиш туфайли соғлиғимизга ҳам зарар етказишимиз мумкин.
Тароқ
Қалин, жингалак соч эгалари тароқларни алоҳида эътибор билан танлашлари лозим. Тишларида думалоқ шарчалар жойлашган арзон пластмасса тароқлар соч толаларини чигаллаштириши ёки юлиб олиши мумкин. Энг яхшиси, текис қиллардан ясалган ва етарлича катта ёстиқчали тароқ мақсадга мувофиқ. Бундай чўтка сочлар бўйлаб юмшоқ сирпаниб, уларни тараши билан бирга шикастланишдан ҳам сақлайди.
Кўзойнак линзалари
Кўзойнак гардишига ортиқча пул сарфлаш шарт эмас — энг муҳими, кўзойнак тақишга қулай бўлиши керак. Лекин линзаларни танлашга жиддий ёндашиш лозим. Офталмологларнинг фикрича, нотўғри танланган кўзойнак соғлиққа жиддий ва тузатиб бўлмайдиган зарар етказмаса-да, кўзларда вақтинчалик ачишиш ва бош оғриғини келтириб чиқариши мумкин.
Ултрабинафша нурлардан етарли даражада ҳимояланмаган арзон қуёшдан ҳимояловчи кўзойнаклар эса чиндан ҳам хавф туғдиради. Қорайтирилган ойналар туфайли кўз қорачиғи кенгаяди ва натижада кўзга кўпроқ ултрабинафша нурлари киради. Бу эса ўз навбатида кўз тўр пардасига зарар етказиши мумкин.
Ёруғлик диодли лампочкалар
Мутахассисларнинг таъкидлашича, ёруғлик диодли лампалардан фойдаланиш уйдаги электр энергияси сарфини 80 фоизгача камайтириш имконини беради. Аммо кўпчилик нафақат электр энергиясидан, балки лампа сотиб олишда ҳам тежамкорликка интилади.
Бу нафақат фойдасиз, балки хавфли ҳам бўлиши мумкин. Биринчидан, арзон ва паст сифатли лампалар бир йилдан ортиқ хизмат қилмайди. Иккинчидан, уларнинг корпуси кўпинча нуқсонли бўлади ва унга тегиниш ток уришига олиб келиши мумкин. Учинчидан, бундай лампалар жуда хира ёки милтилловчи ёруғлик тарқатади, бу эса кўзларни зўриқтириши ва бош оғриғига сабаб бўлиши мумкин.
Қуёшдан сақловчи крем
Дерматологларнинг таъкидлашича, тежаш мумкин бўлмаган косметик воситалардан бири қуёшдан ҳимояловчи кремдир. Кенг ҳимоя спектрига ва юқори SPFга эга сифатли маҳсулотни харид қилиш, уни ҳар куни, ҳатто булутли об-ҳавода ҳам суриш ва очиқ ҳавода кўп вақт ўтказсангиз, янгилашни унутмаслик мақсадга мувофиқдир. Крем нафақат терини қуёш нурларининг зарарли таъсиридан ҳимоя қилади, балки эрта қаришининг олдини ҳам олади.
Аммо бўйин ва кўкрак соҳалари учун қимматбаҳо ёшартирувчи кремларни оддий намловчи воситалар билан бемалол алмаштириш мумкин. Мутахассисларнинг фикрича, бундай махсус ёшартирувчи кремлар юқори нархига қарамай, доим ҳам натижа бермайди. Худди шу тоифага тилла қўшилган кремлар ва серумларни ҳам киритиш мумкин. Тилланинг ёшартирувчи таъсирга эга эканлиги ҳақида илмий исботлар мавжуд эмас.
Телефон қувватлагич
Сифатли қувватлаш қурилмаси арзон муқобилига қараганда 2-5 баробар қимматроқ бўлса-да, унинг афзалликлари анча кўп. У самарали ва узоқ муддат ишлайди, кўпинча турли хил қурилмаларга мос келади ҳамда техникани тезроқ қувватлантиради.
Бундан ташқари, арзон қувватлаш мосламалари хавфли бўлиши мумкин. Баъзида улар нафақат техникани ишдан чиқаради, балки қисмларни ҳаддан ташқари қиздириб, ёнғин чиқиш хавфини ҳам келтириб чиқаради.
Соч бўёғи
Уйда ишлатиш учун мўлжалланган соч бўёғида сочингизни ўзингиз бўяшингиз мумкин. Бироқ арзон воситаларнинг бир нечта яширин камчиликлари мавжуд. Биринчидан, баъзи бўёқлар таркибида кучли кимёвий моддалар бўлиб, уларни узоқ вақт ишлатиш сочга зарар етказиши мумкин. Иккинчидан, ранглар хилма-хиллиги чекланган.
Учинчидан, агар бундай восита аллақачон бўялган сочга қўлланилса, натижа мутлақо кутилмаган бўлиши, ҳатто ҳар қандай салонда ҳам муолажа оқибатларини бартараф этиб бўлмаслиги мумкин. Яхшиси, тежамкорлик қилманг ва қиммат бўлса-да, сифатли воситани танлай оладиган мутахассисга мурожаат қилинг.
Кир ювиш воситалари
Арзон кир ювиш кукуни ва идиш ювиш суюқлиги дастлаб тежамкор харид бўлиб туюлиши мумкин. Аммо кўпинча бундай воситалар фақат миқдори оширилгандагина самарали ишлайди. Натижада барча тежамкорлик беҳуда кетади.
Бундан ташқари, айрим ишлаб чиқарувчилар бундай маиший кимёвий маҳсулотларга формалдегид қўшади. Бу модда антибактериал хусусиятларга эга, бироқ узоқ муддат таъсир этганда ёки нотўғри қўлланилганда соғлиққа зарар етказиши мумкин. Шу сабабли харид қилишдан олдин восита таркибини синчковлик билан ўрганиб чиқиш лозим.
Изоҳ (0)