Бир кеча учун камида 8 минг доллар: Жаҳон юлдузлари дам оладиган дунёнинг энг қиммат курортлари

Бир кеча учун 25 минг долларга меҳмонхона? Бу баъзи одамлар учун умуман муаммо эмас. Аммо бундай нарх оқланиши керак. Дунёнинг энг қиммат курортлари ўзларининг бой ва машҳур меҳмонларига шунча пул эвазига нима таклиф қилишлари мумкин? Қуйида шу ҳақда сўз юритамиз.

Four Seasons Resort Bora Bora

Қаерда жойлашган: Бора-Бора, Франция Полинезияси.

Дам олиш нархи: Оддий хонада 1 кеча учун 1500 доллардан ҳашаматли виллаларда кунига 25 минг долларгача.

Ким дам олади: Жастин Бибер, Никол Кидман, Леонардо Ди Каприо.

Бу курортда сиз ҳашамдор ва дидсиз услубдаги, ҳамда олтин билан қопланган ҳожатхоналарни учратмайсиз. Курорт ташқи томондан қамиш томли кулбалардан иборат балиқчилар қишлоғига ўхшайди.

Аммо ўзингиз тасаввур қилинг-а, бундай “кулбада” уйғонасиз, террасага чиқасиз, атрофингизда эса фируза рангдаги, кристалл сингари тиниқ океан сизни кутиб олади. Айтганча, баъзи хоналардаги поллар шаффоф, шунинг учун сиз ҳатто ухлаб ётганингизда ҳам сув ости дунёсини томоша қилишингиз мумкин.

Шунингдек эксклюзив спа муолажалари ва Мишлен юлдузли ошпазлар пиширадиган ресторанлар ҳам шу пул ичига киради.

The Maldives Private Island by Soneva

Қаерда жойлашган: Малдив ороллари.

Дам олиш нархи: 1 кеча учун 2000 минг доллардан бутун оролни ижарага олиш учун 50 минг долларгача. 

Ким дам олади: Беёнс, Жай-З, Ким Кардашьян.

Бу жой табиати билан Малдивни эслатади: худди шу экологик дизайн орқали олий даражадаги индивидуал хизмат. Эҳтимол, юлдузли меҳмонларни кўпроқ Сонева хусусий оролида ташқи дунёдан тўлиқ ажралиб қолиш ҳам жалб қилар?

Amangiri

Қаерда жойлашган: Юта, АҚШ.

Дам олиш нархи: 1 кеча учун 3 минг доллардан.

Ким дам олади: Опра Уинфри , Кайли Женнер.

Энди худди шу фируза рангдаги денгизли жаннатни чўл ўртасида тасаввур қилинг. Ишонинг, эртакнамо дам олиш фақат денгиз қирғоғида эмас, балки чўл ўртасида ҳам бўлиши мумкин. Гўзал манзаралар, канёнлар ва тоғлар, вертолётли экскурсиялари, панорама кўринишли хоналар — буларнинг барчасини америкалик Amangiri меҳмонхонаси таклиф қилади.

Emirates Palace

Қаерда жойлашган: Абу-Даби, БАА.

Дам олиш нархи: 1 кеча учун 1 000 доллардан президентлик люксида 20 минг долларгача.

Ким дам олади: Билл Гейтс, БАА қироллик оиласи аъзолари.

Бу ерга бой сайёҳларни 1,3 км узунликдаги хусусий пляж, ички безакларига олтиндан ишлов берилган сарой услубидаги архитектура, олтин қўшилган ширинликлар таклиф қиладиган ресторанлар жалб қилади.

The Brando

Қаерда жойлашган: Тетиароа ороли, Франция Полинезияси.

Дам олиш нархи: 1 кеча учун 3 500 доллардан.

Ким дам олади: Барак Обама, Эллен ДеЖенерес

Бу экологик курорт Дон Карлеоне ролини ижро этган Марлон Брандо томонидан яратилиб, машҳур актёр номи билан аталган. Бу ерда дам олиш мафия хўжайинига лойиқ тарзда ташкиллаштирилган бўлиб, бассейнли ва пляжга кириш имконияти бўлган хусусий виллалар, шўнғиш билан шуғулланиш ва маржон рифлари билан танишиш имконияти мавжуд.

Ижтимоий ҳаётдан чарчаган, ёлғизлик ва хотиржамликни қадрловчи машҳурлар

The Brando’да дам олишади. Курорт шунчалик тинч ва сокинки “Оролда биздан бошқа ҳеч ким йўқдек гўё!”, деб ёзилган бир шарҳда.

 Шимолий орол, Сейшел ороллари

Қаерда жойлашган: Сейшел ороллари.

Дам олиш нархи: 1 кеча учун 5 000 доллардан.

Ким дам олади: шаҳзода Уилям ва Кейт Мидлтон бу ерда асал ойи ўтказган.

Бу 11 та вилласи бўлган хусусий орол бўлиб ҳар бирининг ўзига хос пляжи бор. Ёлғиз дам олиш учун идеал жой. Эксклюзив спа-муолажалари ва дайвинг (сувга шўнғиб сузиш) билан ҳам шуғулланиш мумкин.

Laucala Island Resort

Қаерда жойлашган: Фижи

Дам олиш нархи: 1 кеча учун 5 800 доллардан.

Ким дам олади: Опра Уинфри, Мик Жаггер.

25 та вилласи бўлган хусусий орол, ҳар бирининг бассейн ва пляжи бор. У ерда голф, шўнғиш ва от миниш билан шуғулланиш мумкин.

Органик ферма ресторанларни янги маҳсулотлар билан таъминлайди. Ҳар бир вилланинг ўз хизматкори ва бошқа хизмат кўрсатувчилари бор, маҳаллий ошпазлар эса буюртма бўйича ҳар қандай таомни тайёрлаб берадилар.

Cheval Blanc Randheli

Қаерда жойлашган: Малдив ороллари

Дам олиш нархи: 1 кеча учун 2500 доллардан бошланади.

Ким дам олади: Девид ва Виктория Бекҳэмлар

Сизни Luis Vuitton дизайни билан безатилган виллалар, сув ости спа-маркази ва Мишлен юлдузли ошпазлар ишлайдиган ресторанлар кутмоқда. Бундан ташқари ҳар бир меҳмон учун шахсий гид тақдим этилади.

Necker ороли

Қаерда жойлашган: Британия Виржин ороллари.

Дам олиш нархи: Бир тун учун 5000 доллардан ёки бутун оролни ижарага олиш учун 80 минг доллардан. 

Ким дам олади: Опра Уинфри, Кейт Мосс, Стивен Спилберг.

Орол Ричард Брансонга тегишли бўлиб, у курортини юлдузли меҳмонлар учун эксклюзив дам олиш учун тўлиқ ижарага беришдан мамнун. Дам олиш имкониятлари орасида кейсёрфинг, теннис ва йога мавжуд.