Бухоро туманидаги оилавий нодавлат мактабгача таълим ташкилотида 2023 йилда туғилган бола ток уриши оқибатида вафот этди. Бу ҳақда вилоят Мактабгача ва мактаб таълими бошқармаси маълум қилди.
Маълум қилинишича, 28 март куни Бухоро туманида жойлашган ЯТТ Х.Ў.У. оилавий нодавлат мактабгача таълим ташкилотида 1,5 ёшли болани ток урган. Бола вафот этган.
Ўрганишларга кўра, вафот этган бола 2023 йилда туғилган тарбияланувчи Ш.Ш. бўлган.
Таъкидланишича, вилоят ички ишлар бошқармаси томонидан боланинг ўлим сабаблари юзасидан тергов суриштирув ишлари олиб борилмоқда.
Ўтган йилнинг август ойида Сирдарё вилоятининг Мирзаобод туманидаги оилавий мактабгача таълим ташкилотида икки ёшли бола вафот этганди. Шунингдек, февраль ойида оилавий нодавлат мактабгача таълим ташкилоти тарбияланувчиси назоратсиз қолиши оқибатида чиқиб кетиб, вафот этган.
Изоҳ (0)