АҚШнинг ҳар бир президенти Оқ уйга келгач, шахсий диди ёки сиёсий қарашларига қараб интерерга ўзгариш киритади. Президент Дональд Трамп эса максимализм ва олтин безакларга бўлган иштиёқини намойиш қилди. Business Insider нашри Оқ уй дизайнидаги аввалги ва ҳозирги ўзгаришларни таққослади.
Оқ уйни таъмирлаш ишлари ҳалигача давом этмоқда. Сентябрь ойида 8 000 квадрат метр майдонга эга, 200 миллион долларлик зал қурилиши бошланади. У биринчи хоним офислари жойлашган Шарқий қанотда барпо этилади. Трамп бу зални “ҳар бир АҚШ президенти орзу қилган жой” деб атаган.
Овал кабинетдаги ўзгаришлар
Гилам: Байденнинг Овал кабинетдаги тўқ кўк гилами дастлаб Билл Клинтон учун мўлжалланган. Трамп эса уни Роналд Рейган давридаги оч рангли гилам билан алмаштирди. Гилам нақшида президент муҳри, қуёш нурлари ва тинчлик рамзи бўлган зайтун шохчалари тасвирланган.
Байроқлар: Байден даврида фақат иккита байроқ бўлса, Трамп армиянинг турли қўшинларига тегишли байроқларни ҳам қўшди. Улар орасида денгиз пиёдалари корпуси ва денгиз флотига тегишлилари ҳам бор.
Байден президентлиги даврида Овал кабинетнинг шифтида ҳеч қандай қўшимча безаклар бўлмаган. Трамп шифтдаги бўртиб чиққан тасвирларга олтин безак қўшди. Бундай безаклар Байден президентлигидан бери сақланиб қолган олтин рангли пардаларга мос келади.
Деворларда портретлар жойлашуви ўзгарган: Байденнинг Овал кабинетида президент Франклин Рузвельтнинг портрети бор эди. У фикрлар турфа хиллигини рамзий маънода ифодалаш учун Томас Жефферсон, Александр Гамилтоннинг портретларини, шунингдек, Жорж Вашингтон ва Авраам Линкольннинг портретларини бирга илиб қўйган.
Трамп деворда очиқ қолган бўшлиққа қўшимча портретлар ва кўплаб тилла безаклар қўшди. Сиёсатчи Овал офиснинг деворий галереясини яратиш учун безак ромли портретларни танлади. У Рузвельт сурати ўрнини Жорж Вашингтон портрети билан алмаштирди. Каминдаги токчага эса Оқ уй коллекциясидан олинган тарихий олтин ваза ва бошқа буюмларни жойлаштирди.
Трамп ўз номи туширилган қадаҳ тагига қўйиладиган идишга ҳам олтин деталларини қўшган. АҚШнинг амалдаги раҳбари олтин безакларга бўлган қизиқиши билан ажралиб туради. Унинг Нью Йоркдаги Trump Тоwер пентхаусида кўплаб зарҳал шифтлар, мебеллар ва санъат асарлари мавжуд. Президентнинг Палм-Бич шаҳридаги Мар-а-Лаго клубида ҳам полдан шифтгача олтин билан қопланган рақс зали мавжуд.
Трамп иккинчи президентлик давридан олдин Овал кабинетдаги президент муҳри оддий эди. 1934 йилда Рузвельт қўшган гипс релефга у тилла суви бериб, муҳр ва юлдузларни олтин рангга бўятди.
Портретлар ва рамзий танловлар
Байден кириш залида президент Барак Обаманинг расмий портрети туришини танлади. Роберт Маккурди томонидан чизилган гиперреалистик портрет 2023 йилда ўрнатилган. Трамп эса уни ўз портрети билан алмаштирган. Марк Липп чизган расмда Трамп суиқасдга учраган митингда қўлини мушт қилиб кўтараётган ҳолатда тасвирланган.
Нафақат бино ичи, балки ҳовли ҳам ўзгаришга учради
1913 йилда биринчи хоним Эллен Уилсон Оқ уйнинг ташқи ҳовлисини расмий гулзорга айлантириш лойиҳасини ишлаб чиқди. Кейинчалик у матбуот анжуманлари ва тадбирлар ўтказиладиган жойга айланди. 2020 йилда биринчи хоним Мелания эса майсазор атрофига оҳактошдан ишланган чегара қўшди.
Трамп “Атиргул” боғидаги майсалар устидан тош ётқизишга ва уни очиқ террасага айлантиришга қарор қилди. У ўтлар йирик тадбирлар учун яроқсиз, чунки улар нам бўлиши ва баланд пошнали пойабзал кийганлар учун муаммо туғдиришини айтди. Ишчилар июнь ойида ўтларни бетон ва тош плиталар билан алмаштиришни бошлади.
Байден ва ундан олдинги президентлар катта тадбирларни кўпинча Шарқ хонасида ўтказган (сиғими 200 киши). Баъзан, масалан, 2023 йилда Австралия бош вазири Энтони Альбанезни қабул қилганда, Байден тадбирни ҳовлида ўтказган.
Трамп 31 июль куни Шарқий қанотда 650 кишилик бал залини қуриш режасини эълон қилди. Унинг айтишича, лойиҳа харажатлари шахсан ўзи ва бошқа “ватанпарвар донорлар” томонидан қопланади.
Изоҳ (0)