14 март куни Мактабгача ва мактаб таълими вазирлиги томонидан олис ҳудудлардаги болаларни мактабгача таълим билан қамраб олишга мўлжалланган “Ақлвой” автобусларини Тошкент шаҳридан жўнатиш маросими бўлиб ўтди.
2021 йил 10 июндаги ПҚ-5144 қарори ижросини таъминлаш мақсадида мактабгача таълимнинг муқобил шакли сифатида 30 та “Ақлвой” автобуслари қайта жиҳозланиб, республиканинг 11 та ҳудудига йўл олди. Бу орқали таълим хизматларини етказиш қийин бўлган ҳудудларда 142 та мобил гуруҳ шакллантирилади ва қўшимча 2528 нафар бола мактабгача таълим билан қамраб олинади.
— “Ақлвой” автобуслари ичида ўқув-методик ва дидактик материаллар, болалар учун турли ўйин ва ўйинчоқлар тўлиқ жиҳозланган. Шунингдек, автобуслар инфратузилмалар билан таъминланиб, кондиционер ва биоҳожатхоналар ўрнатилган.
— Бу йил юборилган автобуслар сони аввалгиларига нисбатан кўпроқ бўлиб, 30 та қайта жиҳозланган автобус ва болаларни мактабга ташиш учун яна битта автобус ажратилди.
Ташаббуснинг асосий мақсади – аҳолиси тарқоқ жойлашган ва мактабгача таълим муассасалари қуриш қийин бўлган ҳудудларда мобил мактабгача таълим гуруҳларини ташкил этишдир. Ўтган йилларда юборилган автобуслар ота-оналар томонидан ижобий баҳоланди”, дейди Мактабгача ва мактаб таълими вазирлиги Мактабгача таълим тизими фаолиятини мувофиқлаштириш департаменти директор ўринбосари Бердиева Лола Алишеровна.
Мобил гуруҳларда машғулотлар икки сменада уч соатгача давом этади ва барча хизматлар бепул тақдим этилади. Болалар автобус ичида бўлган вақтда унинг ҳаракатланишига йўл қўйилмайди.
“Ақлвой” автобусларида сифатли таълим ва ўйин фаолиятини ташкил этиш учун 60 та ўйин майдончаси жиҳозланган. Бундан ташқари, мобил гуруҳлар юқори малакали педагог кадрлар билан таъминланиб, уларнинг малакасини ошириш бўйича бепул қисқа муддатли ўқув курслари ташкил этилади.
Изоҳ (0)