Sirdaryoda 2 yoshli bog‘cha bolasi vafot etdi. Go‘dak o‘limiga tomog‘iga ovqat tiqilgani sabab bo‘lgan

Sirdaryo viloyatining Mirzaobod tumanidagi oilaviy maktabgacha ta’lim tashkilotida ikki yoshli bola vafot etdi. Bu haqda “Daryo”ga Bosh prokuratura axborot xizmati rahbari Hayot Shamsutdinov xabar berdi. 

Sudga oid tibbiyot ekspertizasining dastlabki ma’lumotiga ko‘ra, go‘dak o‘limiga nafas yo‘llarining ovqat massasi bilan berkilishi sabab bo‘lgan. 

Sirdaryo viloyatining Mirzaobod tumani IIB navbatchilik qismining xabariga ko‘ra, 2024-yilning 7-avgust kuni soat 11:10 larda “Yo‘ldoshobod” MFYda joylashgan YTT “Ashurmatova Zamira Abduvali qizi” oilaviy nodavlat maktabgacha ta’lim tashkiloti tarbiyalanuvchisi 2022-yil 30-mart kuni tug‘ilgan I.S. to‘satdan vafot etgan. Sudga oid tibbiyot ekspertizasining dastlabki ma’lumotiga ko‘ra, I.S.ning o‘limiga nafas yo‘llarining ovqat massasi bilan berkilishi natijasidagi mexanik asfiksiya sabab bo‘lganligi aniqlangan, deyiladi Bosh prokuratura axborotida.

Qo‘shimcha qilinishicha, holat yuzasidan Mirzaobod tumani prokuraturasi tomonidan tergovga qadar tekshiruv o‘tkazilmoqda.