Жиззах вилояти Дўстлик туманида боғча тарбияланувчиси вафот этгани ҳақида хабар берилганди. Бош прокуратура матбуот хизмати раҳбари Ҳаёт Шамсутдинов ҳолат юзасидан жиноят иши қўзғатилганини “Дарё”га маълум қилди.
15 февраль куни соат 09:00 ларда Дўстлик туманида жойлашган оилавий нодавлат мактабгача таълим ташкилоти тарбияланувчилари назоратсиз қолдирилиши оқибатида, уч нафар бола мактабгача таълим ташкилоти ҳовлисидан чиқиб кетган.
Шундан сўнг, шу куни соат 13:00 ларда 2021 йилда туғилган қизча нодавлат мактабгача таълим ташкилотидан тахминан 1 километр узоқликдаги фермер хўжалиги дала майдонидан оқиб ўтувчи ариқдаги сув ичидан вафот этган ҳолда топилган.
Қайд этилган ҳолатларда Жиноят кодексининг 192-модда 11-банди (нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) ва 207-моддада (мансабга совуққонлик билан қараш) назарда тутилган жиноят аломатлари мавжудлиги, ҳолат бўйича бир қатор тергов ҳаракатларини ўтказмасдан туриб қонуний тўхтамга келиб бўлмаслиги инобатга олиниб, жиноят иши қўзғатилди.
Айни пайтда тергов ҳаракатлари олиб борилмоқда.
Изоҳ (0)