“Мактабгача ва мактаб таълими соҳасида бошқарув тизими самарадорлигини оширишнинг қўшимча чора-тадбирлари тўғрисида”ги президент фармони эълон қилинди.
Унга кўра, 2026 йил 1 январдан бошлаб умумий ўрта таълим ташкилотларининг директор жамғармаси маблағлари ҳисобидан директор ва унинг ўринбосарларига фаолият самарадорлиги кўрсаткичлари (KPI) натижасига кўра базавий тариф ставкаларига нисбатан тегишлича 20 ва 10 фоиз миқдорида ҳар ойлик устамалар белгиланади.
Мактабгача ва мактаб таълими вазирлиги икки ой муддатда вазирлик тизимидаги ислоҳотларни амалга ошириш учун белгиланган вазифалардан келиб чиқиб, Қорақалпоғистон Республикаси Мактабгача ва мактаб таълими вазирлиги, вилоятлар ҳамда туман (шаҳар) мактабгача ва мактаб таълими бўлинмалари ходимларининг лавозим мажбуриятларини қайтга кўриб чиқади.
Уч ой муддатда умумий ўрта таълим ташкилотларининг директор жамғармаси маблағлари ҳисобидан директор ва унинг ўринбосарларига ҳар ойлик устамаларни белгилаш учун уларнинг фаолият самарадорлиги кўрсаткичларини (KPI) ишлаб чиқади ва белгиланган тартибда Вазирлар Маҳкамасига киритади.
Фармонга кўра, мактаб директорларига ўз ўринбосарларини ишга қабул қилиш ва ишдан бўшатиш масалаларини мустақил ҳал қилиш ҳуқуқи берилади.
Ушбу фармон қабул қилингани ҳақида 19 март куни мактабгача ва мактаб таълими вазири Ҳилола Умарова хабар берганди. Фармон билан 2025 йил 1 сентябрдан бошлаб мактаб директори ва унинг ўринбосарлари ҳамда мактабгача таълим ташкилоти директорлари иш ҳақи миқдорлари оширилади:
- умумий ўрта таълим ташкилотлари директори лавозимининг базавий тариф ставкаси 20 фоизга,
- ўринбосари лавозимининг базавий тариф ставкаси 15 фоизга,
- боғча директорлари лавозимларининг базавий тариф ставкалари III ва IV гуруҳдаги умумий ўрта таълим ташкилоти директори ўринбосари лавозимининг базавий тариф ставкаларига тенглаштириш орқали.
Мактабгача ва мактаб таълими вазири ҳудудий бўлинмалар ходимларининг кўп йиллик хизмати учун рағбатлантириш жорий этилиши натижасида вазирлик тизимидаги қарийб 15 минг нафар бошқарув ходимларига кўп йиллик хизмати учун рағбатлантириш тизими йўлга қўйилишини билдирганди.
Изоҳ (0)