Фаластин Футбол Ассоциацияси (PFA) 41 ёшли собиқ футболчи, “Фаластин Пелеси” номи билан танилган Сулаймон ал-Убайд Ғазо секторининг жанубида гуманитар ёрдам кутаётган одамларга қилинган ҳужум чоғида ҳалок бўлганини маълум қилди. Бу ҳақда The Guardian нашри хабар берди. Баёнотда айтилишича, ал-Убайд чоршанба куни Исроил кучлари томонидан амалга оширилган ҳужум пайтида вафот этган. 1984 йил 24 мартда Ғазода туғилган ал-Убайд футболчилик фаолиятини “Ҳадамот аш-Шати” клубида бошлаган, шунингдек, “Марказ Шабаб ал-Амари” (Ғарбий Соҳил) ва “Ғазо Спорт” жамоаларида ҳам тўп сурган. 2007 йилда Фаластин терма жамоасида дебют қилган футболчи миллий терма сафида 24 ўйинда майдонга тушиб, 2 та гол муаллифига айланган. Унинг энг машҳур голларидан бири — 2010 йилги Ғарбий Осиё чемпионати доирасида Яман дарвозасига “қайчи услуби”да киритган голи ҳисобланади. Умуман олганда, у фаолияти давомида 100 дан ортиқ гол муаллифига айланиб, Фаластин футболининг энг машҳур вакилларидан бири сифатида эътироф этилади. Ўйин услуби туфайли мухлислар унга тарихдаги энг буюк футболчилардан бири ҳисобланган бразилиялик ҳужумчи Пелега қиёслаб, “Фаластин Пелеси” деган лақабни берган. PFA маълумотига кўра, уруш бошланганидан бери Ғазода камида 662 нафар спортчи ва уларнинг қариндошлари ҳалок бўлган. Улардан 421 нафари футболчилар бўлиб, уларнинг айримлари очлик сабаб вафот этган. Фаластин Футбол Ассоциацияси берган маълумотларга кўра, Ғазо ва Ғарбий Соҳилда 288 та спорт иншооти вайрон бўлган ёки жиддий зарар кўрган. Шундан 268 таси Ғазо ҳудудида жойлашган бўлиб, уларнинг ярмидан кўпи футболга бевосита алоқадор стадионлар, майдонлар ва клуб биноларидир.
Изоҳ (0)