Тошкент вилоятидаги боғчада болаларга қўполлик қилиб келган тарбиячи ишдан олинди. Бу ҳақда вилоят мактабгача ва мактаб таълими бошқармаси хабар берди.
Ижтимоий тармоқларда Назарбекдаги хусусий боғчалардан бирида болалар калтакланаётгани ҳақида хабарлар ва боғча тарбиячиси болаларга қўполлик қилаётгани акс этган видео тарқалганди.
Ўрганишлар натижасида видеодаги ҳолат Зангиота туманида жойлашган оилавий мактабгача таълим муассасасида содир бўлгани аниқланди. 27 март куни Зангиота туман Мактабгача ва мактаб таълими бўлими томонидан ишчи гуруҳ тузилиб, нохуш ҳолат кузатилган оилавий мактабгача таълим муассасасида ўрганиш ишлари олиб борилди.
Ота-оналар муассасадан қайтган фарзандлари билан мулоқот давомида тарбиячининг зўравонлик қилаётганини аниқлаган. Ушбу ҳолатдан хабардор бўлган ота-оналар 26 март куни муассасага келиб, кузатув камераларидаги ёзувларни кўриб чиқишни талаб қилган. Камера ёзувлари кўрилганда 25 март куни ташкилотда октябрь ойидан буён фаолият юритаётган тарбиячи Р.Г. тарбияланувчиларга нисбатан қўпол муносабатда бўлаётгани маълум бўлган.
Муассаса раҳбари мазкур вазиятдан сўнг тарбиячи Р.Г. билан меҳнат шартномасини бекор қилган. Ота-оналарга бундай нохуш ҳолат такрорланмаслиги ва уларнинг ишончини суиистеъмол қилмаслик ҳақида муносабат берган.
Мактабгача ва мактаб таълими вазири Ҳилола Умарова 6 март куни давлат ва нодавлат мактабгача таълим тизими масъуллари билан учрашувда болаларга ҳар қандай шаклда куч ишлатиш, жазолаб тарбиялаш асло мумкин эмаслигини айтганди. Буни тизимда ишлаётган ҳар бир раҳбар, педагог, тарбиячи ва ёрдамчи ходим бирдек тушуниши, шу тартибга риоя этишлари шартлигини таъкидлаганди.
Таълим-тарбия куч ишлатишдан ҳоли бўлиши лозим. Болаларга нисбатан қўполлик қилган ёки шафқатсизларча муносабатда бўлган тарбиячи, педагогга қонун доирасида чора кўрилади. Узр, огоҳлантиришлар билан қутилиб қолиш йўқ, деган эди Ҳилола Умарова.
Сўнгги ойларда боғчаларда болаларга нисбатан қилинган қўпол муносабатлар
2025 йил 14 февраль куни Самарқанднинг Жомбой туманидаги боғчада тарбиячи болаларни уриб, уларни ҳақоратлагани учун жаримага тортилиб, ишдан кетганди. 28 февраль куни Тошкент вилоятининг Паркент туманидаги боғчада тарбиячи болаларнинг қулоғидан тортиб, юз ва бош қисмларига бир неча маротаба ургани аниқланди. 21 февралда Тошкентдаги боғчада бола стулга скотчлаб қўйилгани ортидан тарбиячи ва унинг ёрдамчиси ишдан бўшатилди. 6 февраль куни Сирдарё вилояти Сардоба туманидаги боғчада 6 ёшли боланинг танасига игна санчиб, таҳдид қилингани аниқланди. 6 январда Тошкент вилоятидаги боғчада тарбиячи болаларнинг қулоғидан тортиб, бир неча маротаба ургани аниқланиб, ишдан олинди.
Изоҳ (0)