Сирдарё ва Навоий вилоятларида АҚШ давлатига ишга юборишни ваъда қилган шахслар ушланди, деб хабар бермоқда Прокуратура департаменти.
Маълум қилинишича, Бош прокуратура ҳузуридаги департаментнинг Ширин шаҳри бўлими ва ДХХ ходимлари ҳамкорлигида тезкор тадбир ўтказилган. Тадбирда фуқаро Ф.Р. фуқаро М.Х.нинг ишончига кириб, ўзи ва унинг танишини 38 минг АҚШ доллари эвазига АҚШга ишга юбориши ва виза олиб беришини айтиб, келишилган пуллар ҳисобидан 52 млн сўмни олган вақтида ашёвий далиллар билан ушланган.
Шу каби департаментнинг Навоий шаҳри бўлими, ДХХ ва ИИБ ходимлари ҳамкорлигида тезкор тадбир ўтказилган. Фуқаро М.А. (муқаддам фирибгарлик жинояти учун судланган) фуқаро Л.Қ.нинг ишончига кириб, уни Мексика давлати орқали АҚШга ишга юбориши эвазига 14 минг АҚШ долларини олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 25, 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.
Тошкентнинг Чилонзор туманида АҚШга ишга юбориш учун 40 минг доллар олган шахс ушланганди. Ўзбекистондан АҚШга ноқонуний бориш билан боғлиқ фирибгарлик ҳолатлари ҳақида хабар берилишига қарамай, бундай ҳолатлар тез-тез қайд этилмоқда.
АҚШнинг Ўзбекистондаги элчихонаси ноқонуний миграция хавфли ва серхаражат уриниш эканини билдириб, Ўзбекистон фуқароларини одамларни товар сифатида кўрадиган жиноий гуруҳлар ёлғон ваъдаларига ишониб, жабрдийда бўлишдан огоҳлантирган.
2024 йилда АҚШ ҳукумати 572 ўзбекни депортация қилган. АҚШдан депортация қилинадиган Ўзбекистон фуқаролари сони 975 кишини ташкил этмоқда. Трамп ноқонуний мигрантларнинг Мексика орқали киришини тақиқлади.
Изоҳ (0)