Камбоджа парламентида 25 август куни давлатга хиёнат қилишда айбланган шахсларнинг фуқаролигини бекор қилишни кўзда тутувчи қонун қабул қилинди. Бу ҳақда маҳаллий манбаларга таяниб, Arab News хабар берди.
Тегишли қонун Камбоджа халқ партияси (CPP) устунлик қиладиган Миллий Ассамблеянинг 125 нафар аъзосидан 120 нафари томонидан маъқулланган. Унга кўра, хорижий давлатлар билан тил бириктирган ёки Камбоджа манфаатларига қарши фитна уюштиришда айбланган шахсларнинг фуқаролиги олиб қўйилади.
Мазкур қонун мамлакатда узоқ йиллардан буён ҳокимиятни қўлдан бермаётган CPP мухолифатига қарши босим кучайган бир пайтда тасдиқланмоқда. Мамлакат Олий суди 2017 йилда мухолиф Камбоджа миллий қутқарув партиясини (CNRP) расман тақиқлагач, ҳукумат танқидчиларига нисбатан босим янада кучайган. Ўша йилдан буён юзлаб мухолифат вакиллари устидан оммавий суд жараёнлари ўтказилиб, уларнинг кўпи давлатга хиёнат ва исён қўзғатишга ундаш айбловлари билан қамоқ жазосига ҳукм қилинган.
Бундай чораларнинг қабул қилиниши нафақат инсон ҳуқуқлари фаоллари, балки Қўшма Штатлар каби Ғарб давлатлари томонидан ҳам қаттиқ танқид қилинмоқда. Уларнинг фикрича, бу амалиёт сўнгги икки сайловда деярли рақибларсиз ғалабага эришишни таъминлаган.
Ҳукумат эса юқориидаги танқидларни рад этиб, барча судланган шахслар қонунни бузганини таъкидламоқда. Ҳозирда бир қанча мухолифатчилар хорижда сиёсий бошпана топган. Жумладан, CNRP асосчиларидан Сам Раинси 2016 йилдан бери Францияда, Му Сочуа эса АҚШда яшамоқда.
Камбоджада узоқ йиллар бош вазир бўлган ва ҳозирда CPP раҳбари ҳисобланган Ҳун Сен июнь ойи охирида чиқиш қилиб, “хорижий давлатлар томонига ўтган” фуқароларга қарши чора кўрилишини айтган эди. Раинси эса Ҳун Сеннинг энг кескин танқидчиларидан бири бўлиб, уни июль ойида Таиланд чегарасида юзага келган можарони нотўғри бошқарганликда, армияда коррупция борлигини ва тинч аҳолининг қурбон бўлишини яширишда айблаган эди.
Изоҳ (0)