Франция президенти Эммануэл Макрон телемурожаат чоғида Европадаги иттифоқчиларни француз ядро қуроли билан ҳимоя қилиш бўйича “стратегик дебат” бошланганини айтди. Бу ҳақда “РБК” хабар берди.
Мен Европа қитъасидаги иттифоқчиларимизни ядровий тийиб туриш ёрдамида ҳимоя қилиш бўйича стратегик мунозарани бошлашга қарор қилдим, дея эълон қилди Франция президенти.
Макроннинг таъкидлашича, “нима бўлишидан қатъи назар, ядро қуролидан фойдаланиш тўғрисидаги қарор ҳар доим Франция президенти қўлида бўлган ва бўлади”.
Буюк Британия Европа Иттифоқидан чиққандан сўнг, Франция ядро қуролига эга бўлган ягона иттифоқ мамлакати бўлиб қолди. Европа ҳудудида Американинг ядровий каллаклари жойлаштирилган, бироқ Дональд Трамп ҳокимиятга келганидан кейин Америка кучларини Европадан олиб чиқиб кетиш мумкинлиги ҳақидаги мунозаралар фаоллашди.
Франция “ядро клуби”нинг тўққизта давлатидан бири ҳисобланади. Стокгольм халқаро тинчлик тадқиқотлари институти (SIPRI) маълумотларига кўра, 2023 йил бошига келиб унинг арсеналида 290 та ядровий каллак бор эди.
2017 йилда Париж “Мудофаа ва миллий хавфсизлик бўйича стратегик шарҳ”ни эълон қилди. Унда ўзининг ядро сиёсатининг асосий моҳияти белгилаб берди:
- Франциянинг ядровий тийиб туриш сиёсати фақат мудофаа характерига эга;
- ядро қуролидан фойдаланиш “фақат қонуний ўзини ҳимоя қилишнинг фавқулодда шароитларида мумкин бўлади”, шу сабабли бу қуроллар “миллат хавфсизлиги, ҳимояси ва мустақиллигининг кафолати” ҳисобланади.
Макрон ўз мурожаатида Украинадаги урушни Россия шартлари асосида тўхтатишга қарши чиқди. У тинчлик “ҳеч қандай нарх эвазига ва Россия ҳукмронлиги остида ўрнатилиши мумкин эмаслигини ҳамда Украинанинг таслим бўлиши билан амалга оширилмаслигини” таъкидлади.
Бундан ташқари, Франция раҳбари Россия шимолий кореялик аскарлар ва Эрон ҳарбий техникасидан фойдаланиб, Украинадаги урушни “глобал можарога” айлантирганини айтди.
Россиянинг Украинада тўхташига ким ишонади? Россия аллақачон Франция ва Европа учун таҳдидга айланди, деди Франция президенти.
Изоҳ (0)