Ўзбекистонда 2025 йилнинг февраль ойида истеъмолчиларга 116,4 млн чек учун 86,9 млрд сўмдан ортиқ кешбек тўланди. Бу ҳақда Солиқ қўмитаси матбуот хизмати хабар берди.
Маълум қилинишича, тўланган кешбекларнинг энг катта қисми Тошкент шаҳрига тўғри келган — 37,6 млрд сўм.
Кейинги ўринни эса Тошкент вилояти эгаллаган — 8,4 млрд сўм. “Кучли учлик”дан Самарқанд вилояти ўрин эгаллаган — 7,4 млрд сўм.
Бундан ташқари, Фарғона вилоятига 5,3 млрд сўм, Андижон вилоятига 4 млрд сўм кешбек тўланган.
2025 йилнинг январь ойида истеъмолчиларга 118,5 млн чек учун 92,6 млрд сўмдан ортиқ кешбек тўланган эди.
Ўзбекистонда 2024 йили (4 февраль ҳолатига) истеъмолчиларга 1 млрд чек учун 1 трлн сўмдан ортиқ кешбек тўлангани ҳақида хабар берилганди.
Кешбек қайтариш тизими
Ўзбекистонда 2024 йилнинг 1 июлидан бошлаб нақд пулдаги тўловлар учун кешбек қайтарилиши бекор қилиниши мумкинлиги айтилганди. Бу ҳақда “Яширин иқтисодиётга қарши курашиш бўйича комплекс чора-тадбирларни амалга ошириш тўғрисида”ги президент қарори лойиҳасида кўзда тутилган.
“Дарё” танишиб чиққан ҳужжат лойиҳасига кўра, чакана савдо, хизмат кўрсатиш ҳамда умумий овқатланиш соҳаларида жисмоний шахслар томонидан тўловлар мобил иловалар (нақдсиз) ва пластик карта орқали амалга оширилганда 1 фоиз миқдорида кешбек қайтарилади ҳамда тўловлар нақд пулда амалга оширилганда кешбек қайтариш тартиби бекор қилиниши белгиланмоқда.
Маълумот учун, чакана савдо, умумий овқатланиш ва аҳолига маиший хизмат кўрсатиш объектларида амалга оширилган харид учун берилган чеклар учун кешбек 2022 йилдан берила бошлаганди.
2024 йил январдан аҳолига қайтариладиган 1 фоизлик кешбек суммасига чегаравий миқдор ўрнатилди.
Изоҳ (0)