Солиқ қўмитаси I ярим йилликда қайси ҳудудларда истеъмолчилар кўпроқ кешбэкка эга бўлгани ҳақида маълумот берди.
Унга кўра, жорий йил бошидан (29 июль ҳолатига) истеъмолчиларга 421,1 миллион чек учун 429,5 миллиард сўм кешбэк тўланган. Шундан қарийб 71,5 миллиард сўми июнь ойи учун берилган. Тўланган кешбэкларнинг энг катта қисми қуйидаги ҳудудларга тўғри келмоқда:
- Тошкент шаҳри — 176,9 миллиард сўм;
- Тошкент вилояти — 42,5 миллиард сўм;
- Самарқанд вилояти — 36,8 миллиард сўм;
- Фарғона вилояти — 31,4 миллиард сўм;
- Қашқадарё вилояти — 20,5 миллиард сўм.
Ўзбекистонда 1 июлдан бошлаб нақд пулдаги тўловлар учун кешбэк қайтарилиши бекор қилиниши мумкинлиги айтилганди. Бу ҳақда “Яширин иқтисодиётга қарши курашиш бўйича комплекс чора-тадбирларни амалга ошириш тўғрисида”ги президент қарори лойиҳасида кўзда тутилган.
“Дарё” танишиб чиққан ҳужжат лойиҳасига кўра, 2024 йил 1 июлдан бошлаб чакана савдо, хизмат кўрсатиш ҳамда умумий овқатланиш соҳаларида жисмоний шахслар томонидан тўловлар мобил иловалар (нақдсиз) ва пластик карта орқали амалга оширилганда 1 фоиз миқдорида кешбэк қайтарилади ҳамда тўловлар нақд пулда амалга оширилганда кешбэк қайтариш тартиби бекор қилиниши белгиланмоқда.
- Маълумот учун, чакана савдо, умумий овқатланиш ва аҳолига маиший хизмат кўрсатиш объектларида амалга оширилган харид учун берилган чеклар учун кешбэк 2022 йилдан берила бошлаганди.
- 2024 йил январдан аҳолига қайтариладиган 1 фоизлик кешбэк суммасига чегаравий миқдор ўрнатилди.
Изоҳ (0)