O‘zbekistonda 2025-yilning yanvar oyida iste‘molchilarga 118,5 mln chek uchun 92,6 mlrd so‘mdan ortiq keshbek to‘langan. Bu haqda Soliq qo‘mitasi matbuot xizmati xabar berdi.
To‘langan keshbeklarning eng katta qismi Toshkent shahriga to‘g‘ri kelmoqda — 37,1 mlrd so‘m. Keyin o‘rinda esa Toshkent viloyati — 9,2 mlrd so‘m.
Bundan tashqari:
- Samarqand viloyati — 8,5 mlrd so‘m;
- Farg‘ona viloyati — 5,9 mlrd so‘m;
- Andijon viloyati — 4,5 mlrd so‘m.
Avvalroq O‘zbekistonda 2024-yili (4-fevral holatiga) iste’molchilarga 1 mlrd chek uchun 1 trln so‘mdan ortiq keshbek to‘langani haqida xabar berilgandi.
Keshbek qaytarish tizimi
O‘zbekistonda 2024-yilning 1-iyulidan boshlab naqd puldagi to‘lovlar uchun keshbek qaytarilishi bekor qilinishi mumkinligi aytilgandi. Bu haqda “Yashirin iqtisodiyotga qarshi kurashish bo‘yicha kompleks chora-tadbirlarni amalga oshirish to‘g‘risida”gi prezident qarori loyihasida ko‘zda tutilgan.
“Daryo” tanishib chiqqan hujjat loyihasiga ko‘ra, chakana savdo, xizmat ko‘rsatish hamda umumiy ovqatlanish sohalarida jismoniy shaxslar tomonidan to‘lovlar mobil ilovalar (naqdsiz) va plastik karta orqali amalga oshirilganda 1 foiz miqdorida keshbek qaytariladi hamda to‘lovlar naqd pulda amalga oshirilganda keshbek qaytarish tartibi bekor qilinishi belgilanmoqda.
Ma’lumot uchun, chakana savdo, umumiy ovqatlanish va aholiga maishiy xizmat ko‘rsatish obyektlarida amalga oshirilgan xarid uchun berilgan cheklar uchun keshbek 2022-yildan berila boshlagandi.
2024-yil yanvardan aholiga qaytariladigan 1 foizlik keshbek summasiga chegaraviy miqdor o‘rnatildi.
Izoh (0)