Ўзбекистонда 2025 йилнинг январь ойида истеъмолчиларга 118,5 млн чек учун 92,6 млрд сўмдан ортиқ кешбек тўланган. Бу ҳақда Солиқ қўмитаси матбуот хизмати хабар берди.
Тўланган кешбекларнинг энг катта қисми Тошкент шаҳрига тўғри келмоқда — 37,1 млрд сўм. Кейин ўринда эса Тошкент вилояти — 9,2 млрд сўм.
Бундан ташқари:
- Самарқанд вилояти — 8,5 млрд сўм;
- Фарғона вилояти — 5,9 млрд сўм;
- Андижон вилояти — 4,5 млрд сўм.
Аввалроқ Ўзбекистонда 2024 йили (4 февраль ҳолатига) истеъмолчиларга 1 млрд чек учун 1 трлн сўмдан ортиқ кешбек тўлангани ҳақида хабар берилганди.
Кешбек қайтариш тизими
Ўзбекистонда 2024 йилнинг 1 июлидан бошлаб нақд пулдаги тўловлар учун кешбек қайтарилиши бекор қилиниши мумкинлиги айтилганди. Бу ҳақда “Яширин иқтисодиётга қарши курашиш бўйича комплекс чора-тадбирларни амалга ошириш тўғрисида”ги президент қарори лойиҳасида кўзда тутилган.
“Дарё” танишиб чиққан ҳужжат лойиҳасига кўра, чакана савдо, хизмат кўрсатиш ҳамда умумий овқатланиш соҳаларида жисмоний шахслар томонидан тўловлар мобил иловалар (нақдсиз) ва пластик карта орқали амалга оширилганда 1 фоиз миқдорида кешбек қайтарилади ҳамда тўловлар нақд пулда амалга оширилганда кешбек қайтариш тартиби бекор қилиниши белгиланмоқда.
Маълумот учун, чакана савдо, умумий овқатланиш ва аҳолига маиший хизмат кўрсатиш объектларида амалга оширилган харид учун берилган чеклар учун кешбек 2022 йилдан берила бошлаганди.
2024 йил январдан аҳолига қайтариладиган 1 фоизлик кешбек суммасига чегаравий миқдор ўрнатилди.
Изоҳ (0)