Четга ишлашга кетган фуқароларга ҳам Ўзбекистонда ипотека кредити олиш имконияти берилади. Бу президентнинг 21 февралдаги фармони билан тасдиқланган “йўл харитаси”да белгиланди.
-uF-ptM2a.jpg)
Унга кўра, чет элда вақтинча меҳнат фаолиятини амалга ошираётган шахслар ва салбий кредит тарихига эга бўлган фуқаролар учун ипотека кредити ва субсидиядан фойдаланиш имкониятини кенгайтириш кўзда тутилган. Бу вазифа Марказий банкка топширилган бўлиб, ижро муддати этиб 2025 йил 1 апрель кўрсатилган.
Иқтисодиёт ва молия вазирлиги ҳам ушбу санагача ипотека кредитини ажратишда банкларнинг хатарларини камайтиришга хизмат қилувчи давлат ипотека кафолатини тақдим этиш механизмини жорий қилиш бўйича Вазирлар Маҳкамасига таклиф киритиши лозим.
Солиқ қўмитаси Иқтисодиёт ва молия вазирлиги билан бирга кўп квартирали уй-жойлардаги янги турар ва нотурар жойларни қурилиш ташкилотларидан тўловни тижорат банки орқали амалга ошириб сотиб олган фуқароларга тўланган қўшилган қиймат солиғи суммасининг бир қисмини кешбек сифатида қайтариш бўйича таклиф ишлаб чиқиш ва Президент администрациясига киритиши белгиланди.
Президент раислигида ипотека дастури доирасида 2024 йилда амалга оширилган ишлар ва 2025 йил учун режалар муҳокамаси юзасидан ўтказилган видеоселектор йиғилишида мамлакатда аҳолига расмий иш жойи бўлмаса ҳам, даромадини декларация асосида ҳисобга олиб, ипотека кредити олиши учун имконият яратилган. Лекин ҳозирда хорижга ишлашга кетганларга “Ўзбекистонда расмий даромади йўқ” деган важ билан кредит ва субсидия берилмаётгани қайд этиб ўтилганди.
Президент мутасаддиларга хорижда меҳнат қилаётган ва олти ой ичида мунтазам пул ўтказиб келаётган фуқаролар даромадини ҳисобга оладиган тизим яратишни топширганди.
Ўзбекистонда 2024 йилда жами 17,1 трлн сўм миқдоридаги ипотека кредитлари ажратилиб, 59 минг нафарга яқин фуқаролар уй-жой билан таъминланди. 2025 йилда ипотека кредитлари бўйича дастлабки бадал ва фоиз тўловларининг бир қисмини қоплаш учун субсидиялар 1,5 бараварга оширилади. Мазкур мақсадларга давлат бюджетидан 2,5 триллион сўм йўналтирилади.
Ипотека кредитлари учун субсидия олишга аризалар қабули 3 мартдан бошланади. Дастур доирасида 30 000 нафар талабгорга ипотека кредитлари бўйича субсидиялар ажратиш белгиланмоқда.
2025 йил 1 майдан қурилишни бошлашдан фойдаланишга рухсатнома беришга қадар бўлган жараёнлар тўлиқ онлайн режимида “Шаффоф қурилиш” тизимида амалга оширилади. Бузилаётган турар ва нотурар жой объектининг бозор қиймати тўлиқ қоплаб берилади.
Янги қуриладиган уйлар марказлаштирилган иситиш тизимига уланиб, электр плиталари билан жиҳозлаш режалаштирилган.
Изоҳ (0)