Президентнинг “Ўзбекистон Республикаси президентининг ёшлар билан очиқ мулоқотида белгиланган вазифаларни амалга оширишга доир чора-тадбирлар тўғрисида” ги фармони қабул қилинди. Бу ҳақда Адлия вазирлиги хабар берди.
Фармонга кўра, креатив индустрия парки ҳудудларда унинг филиаллари ҳамда уларда креатив соҳа вакилларини ўқитадиган бизнес мактаблари ташкил этилади.
- 2025 йил 1 майдан 2031 йил 1 январгача креатив парк резидентларига қуйидаги солиқ имтиёзлари жорий этилади:
- ижтимоий солиқни ҳамда жисмоний шахслардан олинадиган даромад солиғини 50 фоиз камайтирилган ставкада тўлайди;
- товарларни (ишларни, хизматларни) реализация қилишдан олинган даромади миқдоридан қатъи назар айланмадан олинадиган солиқ тўловчилар тоифасига киритилади. Бунда улар ўз истагига биноан умумбелгиланган солиқ солиш тартибига ўтишлари мумкин.
Бундан ташқари, хорижий тиллар бўйича камида C1 даражадаги миллий ёки унга тенглаштирилган мос даражадаги халқаро тан олинган сертификатни олганига 2 йилдан ошмаган ёшларга олис ва бориш қийин бўлган ҳудудларда чет тилларига ихтисослашган ўқув марказларини очиш учун 6 ойлик имтиёзли давр билан 3 йил муддатга БҲМнинг 320 бараваригача (120 млн сўмгача) миқдорда фоизсиз ссуда берилади.
14 февраль куни президентнинг ёшлар билан мулоқоти давомида Ўзбекистонда креатив индустрия парклари энди ҳудудларда ҳам барпо этилиши айтилганди. Тошкент шаҳридаги “Ёшлар ижод саройи”да намунавий креатив парк ташкил қилинганди. Давлат раҳбари энди креатив индустрия парклари ҳудудларда ҳам барпо этилишини айтган эди.
Мамлакатда креатив иқтисодиёт жадал ривожланаётган бўлиб, соҳада фаолият кўрсатаётганларнинг 98 фоизини ёшлар ташкил этади. Креатив саноат паркларини ривожлантириш учун 2024 йилда 10 миллион доллар йўналтирилди.
Президент 2023 йилда ёшлар ўртасида IT, реклама, кино, архитектура, дизайн, маркетинг, ҳунармандчилик, рассомчилик каби йўналишларга қизиқиш ортиб бораётганини ҳисобга олиб, вилоят ҳокимларига биттадан креатив парк ташкил этишни топширганди.
Изоҳ (0)