Ўзбекистонда солиқ органларига 2024 йил 1 июлдан солиқ тўловчи ҳудудига кириш ва бинони кўздан кечириш ваколати берилиши мумкин. Бу ҳақда “Яширин иқтисодиётга қарши курашиш бўйича комплекс чора-тадбирларни амалга ошириш тўғрисида”ги президент қарори лойиҳасида кўзда тутилган.
Унга кўра, қуйидаги ҳолатлар аниқланган тақдирда тадбиркорлик субъектларини хабардор қилмасдан ҳамда бизнес омбудсманни текшириш кунида хабардор қилган ҳолда белгиланган тартибда сайёр текширувларини ўтказиш ваколати берилади:
- тўлов интизомига риоя қилмаслик, шу жумладан назорат-касса техникасининг ва (ёки) ҳисоб-китоб терминалларининг қўлланилиши тартибини бузиш, харидорга фискал чек бермаслик;
- ишчи ходимлар сонини яшириш;
- ер қаъридан фойдаланишда солиқ қонунчилигини бузиш.
Йирик солиқ тўловчилар сонини оптималлаштириш ва ҳудудий солиқ инспекцияларининг фаолиятини кучайтириш мақсадида йирик солиқ тўловчи тоифасига ўтиш учун йиллик товар айланмасининг амалдаги чегараси 170 миллиард сўм этиб белгиланади ҳамда пахта-тўқимачилик кластерлари, тўқимачилик соҳасидаги тўловчилар ва “шароб савдо” корхоналари маъмурчилиги ҳудудий солиқ бошқармаларига ўтказилади.
Амалдаги солиқ қонунчилигида солиқ базасини яширганлик ва тўловлардан қочиш ёки тўлиқ тўламаслик учун белгиланган жавобгарлик асослари божхона қонунчилигида ҳам қўлланилади.
Бунда:
- товарларни декларацияламаслик ёки нотўғри декларациялаш натижасида божхона тўловлари тўлиқ тўланмаганда ёки унинг миқдори камайтирилганда;
- божхона тўловлари бўйича имтиёзли товарлардан бошқа мақсадларда ёки мақсадсиз фойдаланиш ва уларни тасарруф этиш тартиби бузилганда;
- товарлар шартли чиқариб юборилган пайтдан эътиборан уч йил ичида бошқа мақсадларда фойдаланилганда божхона органлари томонидан божхона тўловларини тўлаш мажбурияти юзага келган суммасининг 20 фоизи миқдорида жарима солишга сабаб бўлади.
Мазкур банддаги ҳолатлар юз берганда божхона имтиёзлари бекор қилинади ва божхона тўловларини тўлаш мажбурияти тикланади.
Эслатиб ўтамиз, камерал солиқ текширувини ўтказишда солиқ органларининг қуйидаги ҳуқуқлари бекор қилинганди:
- солиқ тўловчининг ҳудудига кириш;
- солиқ тўловчининг ҳудудини ва биноларини кўздан кечириш;
- солиқ тўловчидан ҳужжатларни талаб қилиб олиш ва уни чақиртириш;
- солиқ тўловчининг ҳужжатлари ва буюмларини олиб қўйиш.
Аввалроқ ушбу қарор лойиҳаси билан уй-жой ва автомобиллар олди-сотдисини нақд пулсиз шаклга ўтказилиш таклиф этилаётгани, нақд пулдаги тўловлар учун кешбэк қайтарилиши бекор қилиниши мумкинлиги ҳақида хабар берилган эди.
Изоҳ (0)