Ўзбекистонда 2024 йили (4 февраль ҳолатига) истеъмолчиларга 1 млрд чек учун 1 трлн сўмдан ортиқ кешбек тўланган. Бу ҳақда Солиқ қўмитаси матбуот хизмати хабар берди.
Қайд этилишича, шундан 89,2 млрд сўми декабрь ойи учун берилган.
Тўланган кешбекларнинг энг катта қисми Тошкент шаҳрига тўғри келди — 412,2 млрд сўм. Шунингдек, Тошкент вилояти (107,1 млрд сўм) ва Самарқанд вилояти (93,2 млрд сўм) ҳам етакчи бўлиб турибди.
Фарғона (75,6 млрд сўм) ва Андижон (52 млрд сўм) вилоятлари эса “кучли бешлик”дан жой олган.
Нисбатан паст кўрсаткичлар Сирдарё ва Жиззах вилоятларида қайд этилган. Мазкур ҳудудларда йил давомида мос равишда 15,5 млрд ва 22,5 млрд сўм тўланган.
Кешбек қайтариш тизими
Ўзбекистонда 2024 йилнинг 1 июлидан бошлаб нақд пулдаги тўловлар учун кешбек қайтарилиши бекор қилиниши мумкинлиги айтилганди. Бу ҳақда “Яширин иқтисодиётга қарши курашиш бўйича комплекс чора-тадбирларни амалга ошириш тўғрисида”ги президент қарори лойиҳасида кўзда тутилган.
“Дарё” танишиб чиққан ҳужжат лойиҳасига кўра, чакана савдо, хизмат кўрсатиш ҳамда умумий овқатланиш соҳаларида жисмоний шахслар томонидан тўловлар мобил иловалар (нақдсиз) ва пластик карта орқали амалга оширилганда 1 фоиз миқдорида кешбек қайтарилади ҳамда тўловлар нақд пулда амалга оширилганда кешбек қайтариш тартиби бекор қилиниши белгиланмоқда.
Маълумот учун, чакана савдо, умумий овқатланиш ва аҳолига маиший хизмат кўрсатиш объектларида амалга оширилган харид учун берилган чеклар учун кешбек 2022 йилдан берила бошлаганди.
2024 йил январдан аҳолига қайтариладиган 1 фоизлик кешбек суммасига чегаравий миқдор ўрнатилди.
Изоҳ (0)