Қашқадарё вилоятида солиқ ходими ва МЧЖ раҳбарининг ноқонуний ҳаракатларига чек қўйилгани маълум қилинди.
Келтирилишича, Қарши шаҳар Солиқ инспекциясининг солиқ маъмурчилиги шўбаси бош инспектори ўз хизмат мавқейидан фойдаланиб, 2 та дорихона раҳбарининг ишончига кирган ва унга нисбатан қўлланилган 150 млн сўм миқдоридаги солиқ қарздорлигини суд органларидаги танишлари орқали бартараф қилиб бериш эвазига 50 млн сўм талаб қилган.
Лекин ДХХ ва Бош прокуратура ҳузуридаги департамент ходимлари томонидан ўтказилган тезкор тадбирда у сўралган пул маблағидан 10 млн 400 минг сўм олган вақтида ашёвий далиллар билан ушланди.
Қарши шаҳрида кузатилган бошқа ҳолатда эса, маҳаллий МЧЖ раҳбари мансабдор танишлари орқали транспорт воситаларини таъмирлаш ва техник хизмат кўрсатиш билан шуғулланувчи МЧЖга банкдан 1 млрд 500 млн сўм кредит олиб бериш эвазига, унинг раҳбаридан 84 млн сўм олган вақтида ушланди.
Ҳозирда ҳар икки ҳолат юзасидан қонунбузарларга нисбатан Жиноят Кодексининг 168 ва 28,211-моддалари билан жиноят ишлари қўзғатилиб, тергов ҳаракатлари олиб борилмоқда.
2025 йилнинг январида Наманган вилояти Поп тумани фавқулодда вазиятлар бўлими бошлиғи 160 минг доллар олаётганида қўлга тушганди. Сирдарё вилояти Сайхунобод тумани Фавқулодда вазиятлар бўлимининг тезкор бўлинмаси бошлиғи ҳам ноқонуний равишда 7 минг доллар олаётганида ушланганди.
Пора олган солиқчилар
Зангиота туманида Солиқ инспекциясининг шўба бошлиғи вазифасини бажарувчи шахс қурилиш моллари ишлаб чиқаришга ихтисослашган оилавий корхонанинг фаолиятига раҳнамолик қилиш ва 1 йил давомида текширув ўтказмаслик эвазига 1200 доллар олган вақтида ашёвий далиллар билан ушланганди.
Сирдарё вилояти Солиқ бошқармасининг солиқ тўловчиларга хизмат кўрсатиш бўлими бош инспектори Гулистон шаҳрида фаолият юритувчи учта МЧЖнинг солиқ қарзларини, ушбу МЧЖларни соддалаштирилган тартибда банкрот деб топиш йўли билан бартараф қилиб бериш эвазига 4 минг доллар олган вақтида ашёвий далиллар билан ушланган.
Наманган вилояти Янгиқўрғон тумани солиқ инспекцияси катта инспектори боғдорчиликка ихтисослашган фермер хўжаликнинг 2023 ва 2024 йиллар учун ер солиғидан аниқланган 11 миллион 200 минг сўм миқдоридаги қарздорлигини бартараф қилиб бериш эвазига 7 миллион сўм, шунингдек, ушбу фермер хўжалик раҳбарининг танишига тегишли нотурар жойнинг мол-мулк ва ер солиқларидан бўлган 55 миллион 100 минг сўм қарздорлигини ҳам тўлиқ бартараф қилиб бериш эвазига 28 миллион сўм талаб қилади. У талаб қилинган жами 35 миллион сўм пул маблағини олган вақтида ушланган.
Изоҳ (0)