Ўзбекистонда 2024 йилда тармоққа узатилган электр энергиясини сотишдан тушган тушум 4 053 млрд сўмни ташкил этгани маълум қилинди.
АОКАда “Ўзбекгидроэнерго”АЖ раҳбарияти иштирокида ўтказилган матбуот анжуманида 2024 йил давомида амалга оширилган ишлар ҳамда 2025 йилдаги режалар ҳақида маълумот берилди. Жамият томонидан бугунги кунга қадар умумий қуввати 430 МВтга тенг бўлган 55 та ГЭС фойдаланишга топширилди.
Шундан 42 та янги ГЭС қурилган бўлса, 13 та мавжуд ГЭС замонавий талаблар асосида тўлиқ модернизация қилинди. 2024 йил якунлари билан жамиятнинг умумий активлари қиймати илк бор 1 млрд 200 млн долларга етказилди. 2017 йил билан таққосланганда, жами активлар қиймати 4 баробарга ошди.
2024 йилда тизимдаги энергия ҳосил қилувчи корхоналар томонидан 8,2 млрд кВт-соат электр энергияси ишлаб чиқарилди. “Ўзбекгидроэнерго” АЖ миллий электр тармоқларига электр энергиясини етказиб бериш асносида, йирик солиқ тўловчи сифатида ўтган йилнинг ўзида давлат бюджетига қарийб 1 триллион сўмлик солиқ ва бошқа тўловларни амалга оширди.
“Ўзбекгидроэнерго” АЖ томонидан жорий 2025 йилда қуйидаги асосий йўналишлар бўйича устувор вазифаларни амалга ошириш мақсад этиб белгиланган:
- 2025 йилда электр энергияси ишлаб чиқаришда ўтган йилга нисбатан 10 фоиз ўсиш суръатига эришиш;
- Инвестиция дастурига асосан умумий 3,3 млрд долларга тенг 14 та лойиҳани амалга ошириш;
- умумий қуввати 222 МВт, йиллик ишлаб чиқариши 1 млрд кВт-соатга тенг 38 та лойиҳани фойдаланишга топшириш.
Ўзбекистонда 2025 йил энергетика корхоналари учун тежамкорлик ва самарадорлик йили бўлади. Электр энергияси ишлаб чиқариш, узатиш ва тақсимлаш жараёнлари алоҳида компанияларга ажратилиб, инвестиция учун имкониятлар яратилди. Охирги беш йилда электр энергияси ишлаб чиқаришга 4 миллиард 300 миллион доллар инвестиция кириб келди ҳамда 5,7 гигаватт янги қувватлар яратилди.
Изоҳ (0)